第一次試戴大眼仔出街

1 Oct 2011 係我哋拍拖 3 週年o既大日子, 但係由於 Eric 要返工, 所以我地唯有今日提早慶祝啦！

隆重其事, 今日一早起身整妝待發, 興致勃勃咁拎咗對 Con 出黎試戴, 唔知點解, 第一兩次試戴o既時候, 對 Con 明明已經上咗眼, 但係一斬眼隻 Con 就會甩, 好奇怪, 明明之前响眼鏡鋪戴帶都冇事格～
好彩後尾, 試多次, 唔斬眼, 而係合埋隻眼一陣, 隻 Con 就冇再甩啦！

戴咗之後, 對眼真係大咗好多, 可能睇唔慣, 同埋加上未化妝啦, 感覺怪怪哋咁, hahah 

但係化好妝之後, 成個人都 "卡嘩依" 咗！

一於分享兩張嚇人照俾大家睇吓先, kekeke

(自拍o既關係, 有小小豆雞, hahaha)

未戴 Con, 未化妝o既無敵細眼仔：

戴咗 Con, 化妝後, 明亮、有神o既大眼仔 (我化妝唔叻, 如有嚇親, 敬請見諒 )：

由 10:30am 戴好對 Con, 直踩到 11:00pm, 對眼都冇乾, 冇唔舒服, 除咗有時對眼碌得太大, 感覺對 Con 有小小～ 想甩 (當然係冇甩啦) / 斬眼 "High" 到對 Con 之外, 全日都好舒服！！！

大眼仔試 Con 後感

今日去咗試 Con 啦, 我試果間係皇室堡o既亮視點, HKD100.00 送五對 Con (可以揀唔同色, 無論啱唔啱戴, 都要俾 HKD100.00, Check 過覺得你唔啱戴, 係唔會俾 Con 你o既) 

果度o既服務.... OK la.....

只不過............我覺得.......... D 員工冇做足準備囉, 我明明約好晒話試大眼仔, 試咩色個女職員有 Mark 低, 通過電話 Confirm 個喎, 個視光師都有打俾我約時間個喎, 點知去到, 佢夠膽死幫我 Check 完俾對散光 Con 我試！！！跟住我話：[ 咦... 唔係喎.....我係想試啡色同金色個喎....我果日都有同你地個女同事講, 佢仲 Mark Down 咗個喎.......] 跟住個視光師仲要講句：[我仲以為你係配散光 Con 添]  真係唔知佢地 D 員工有冇好好溝通........

我 N 年前戴過散光 Con, 感覺上而家呢隻大眼仔原來係薄過散光 Con 好多！

我戴同除都係一次過, 好順利～ 响果度坐咗 20min 對眼冇唔舒服, feel 到對 Con 真係好薄～

過咗一陣, 佢就叫返我入房驗弧度, 佢驗弧度果部機超～～～"燦"眼！！！

由於我係一邊試一隻色, 所以即時响果度除返對 Con (好可惜竟然冇同對眼影相.....), 對 Con 真係好薄, 一除果吓就"摷", 我特登拎返條 Con 屍返屋企, 俾屋企人睇, 所以 Feel 唔到戴幾耐會攰o既感覺！  

大家睇完之後, 我就掉咗佢啦～ 對 Con 一搣就難, 以前果 D 2 week 散光 Con 好 un o嫁～ (因為我除咗, 臨掉之前試過搣過 

不過如果真係買, 我都係買平光, 因為 Check 過我冇近視, 只係得散光o者～ (一隻 75 度, 一隻 120 度)

試後感：

啡色：

感覺上好似成隻眼同一隻色咁.... 勁啡........(咁其實係咪即係勁 Match, 勁自然呢？) 但係又好似冇閃亮金咁有神～ 

但係 Eric 就覺得啡色靚 D, 有神 D！！真係好因人而異～

閃亮金：

感覺上自然 D, 但係我 dup 低小小頭, 對眼向上望, 又或者係就戴完 Con 烏個身埋去照鏡, 明顯見到眼白囉 , 初初仲以為係佢 D 金邊, 點知原來係眼白, 但係攪笑在係一點點個囉！ (因為佢 D 線線邊不規則家嘛) 同埋 Eric 話啡色靚 D, 佢覺得閃亮金好恐怖喎～～～～～～～ 實在唔明點解～～～ 其實講自然, 我覺得閃亮金自然 DD o嫁, 但係睇o黎可能戴唔到 lu～

啡色好似單調 D, 但係就啱眼 D, 閃亮金自然, 有唔同層次 D～ 可惜........唉.... 見到小小眼白, 但係我都要咗兩對試真 D！！

其實 Eric 就唔想我戴 Con o既, 因為佢係超驚戴 Con o既  我戴完 Con, 佢好似好鬼死驚咁o既樣～ (幻想戴 Con 過程) 成日驚我會插盲對眼  

不過 Eric 佢話佢睇唔慣, 覺得我戴咗大眼仔有小小假喎！！！！

最後我要咗兩對閃亮金, 三對啡～

間o野話而家冇現貨, 寫咗單俾我, 一個禮拜就有得拎 Con 啦！

啱啱先至發現, 原來我隻眼珠咁鬼細！啡色都係啱啱好, 冇乜眼白咋！閃亮金 BYE BYE..... 

我諗我都係會買啡色o嫁啦...............

One Day Acuvue Define o既資料～

啡色

閃亮金

鏡片弧度 8.5mm 鏡片直徑 14.2mm 

(我都唔記得問佢o地拎返我 D 驗眼資料添！！真失策！！)

♥ 楊黃囍事 ♥ 我要扮靚靚

之前 MUA 話我戴啡色o既大眼仔 Con 會靚 D, 所以呢排都有係咁二睇過吓 D 大眼仔 Con o既資料～

但係由於我本身除咗有散光之外, 都冇其他問題,  N 年前戴散光 Con, 都係因為要考車牌而戴之外, 跟住都冇再戴過 Con 同眼鏡啦～ (除非有重要場合, 考試 / 簽約就會戴, 但係其實都好多年冇戴o嫁啦～)

所以我對呢方面可謂非常之唔熟悉～ 睇咗好幾個牌子, 但係仍然十五十六緊買咩牌子o既大眼仔 Con 好！我又唔想太誇變咗假人～ 自自然然就夠啦～ 好多 Blog 友對唔同牌子o既 Con 都相當之有心得, 各大品牌都有分析添！但係始終人人個眼球都唔同, 所以點都係要小心 D 試吓好～ 格仔鋪果 D 我就一定唔會揀o嫁啦, 因為驚危險～

另一方面, 亦好擔心難除難戴, 因為睇咗好多 Blog 友都話大眼仔 Con 比較滑身, 冇散光 Con 咁厚同埋易除～ 我又唔想冒驗買幾盒 Con 返o黎戴, 一陣唔啱用咪死得！！！對眼好寶貴家嘛！！一陣o徒咗錢仲要傷埋眼, 咪好蝕！！

响我掙扎緊o既期間, 竟然俾我發現 1 • DAY ACUVUE® DEFINE™  有得預約免費試戴喎！！！！

http://hk.asia.acuvue.com/av/promotions/one-day-acuvue-define.html

實在太好啦！話晒又係大牌子, 梗係o拿o拿聲預約啦！！

打去問咗詳情, 姐姐仔話免費試戴, 但係視光師要收 HKD100.00 驗眼費, 送 10 隻大眼仔 Con (我心諗：咁即係五對啦, 講到咁複雜做咩呢？乜你會獨立戴一隻 / 一隻眼一隻色出街o既咩？？) 

跟住我 Re-confirm 佢大眼仔 Con 即係係咪可以揀五對唔同色 (我想試 "閃亮金" 同埋 "動人啡", 比較吓邊隻自然 D, 靚 D～) 姐姐仔話係, 可以自由配答！正！！！！！

我 Book 咗 16 Sept 2011 去試戴, 睇吓效果如何先, kekekekeke 試完再同大家匯報！！！

(另一方面, 大家又有冇其他穩陣又舒服o既牌子介紹吓呢？)