騰騰震！曼谷開心自由人之旅 19 Mar 2011 ( Day 5 )

由於 Book 機票果陣冇做足功課, 唔知道泰國有個勁出名o既翟道翟週日市場！
本來我話想星期四出發, 星期一回程o嫁！但係 Eric 話唔好！！佢話廢事好似俾公司覺得放咗好多日假咁喎...... 結果...... 結果...... 就係呢個決定, 令到我哋去唔到翟道翟啦！！！

原本打算今日去o既～ 但係為免大家太趕同埋咁辛苦, 所以我哋決定輕輕鬆鬆咁完成整個行程就算啦！
我哋去咗........ 食 Lunch Buffet ！！！(估唔到 Lunch 都有生蠔食！！D 蝦勁鮮甜呀！)

  

  

佢 D 甜品好好味！！！！！

  

  


感覺勁 Hea～～ (可惜係臨走果日先至係咁好天氣.....)

  

食飽, Hea 飽之後, 我哋就出咗去行咗一陣～ 原來酒店附近都有個市集仔o嫁～

  


我哋要走啦............ 五日o既假期, 就咁就完咗啦...........




哥哥仔見到我哋拎晒行李, 就叫我哋等一陣, 原來酒店係有篤篤接送去 BTS 站o嫁～ 我哋唔駛拎住 D 行李行過去！真係好貼心o既服務呀！！

   

買埋 Eric 最愛o既吉仔水 (真係鮮窄, 冇加糖都超鮮甜！), 我哋就正式開始起行離開泰國啦！

因為我哋驚塞車, 所以我哋由 Sapan Taksin 去 Phaya Thai 轉 Cityline Phaya Thai 去 Airport (30min & 45b) (BTS 轉 Cityline 個站只需行條天橋)

意外地俾我响橋上面見到間假o既 "建興酒家"！真o既係唔會有個 "好" "Dee" 字o嫁！！即刻影低佢, 俾大家認住佢個樣先！千祈咪中招呀！！！

 

不過有樣o野真係要提一提大家！BTS 係冇電梯o嫁！！！我哋要拎住 D 行李上上落落, 行樓梯！！都真係幾係o野！直至到我哋去到！Cityline Phaya Thai 站, 我哋先至可以抖吓....... 終    於    都    有   "車立"   撘    啦！呢個方法, 無異係平好多, 快好多, 同埋唔駛驚塞車！但係就真係要好好咁考驗大家o既體力同臂力啦！


終於去到機場啦.........！我哋第一時間去咗排隊退稅, 退稅手續都幾煩！好在我哋一早已經做晒功課！

退稅, 首先一定要响入閘前去搵咗個好難搵o既房仔俾張單佢蓋退稅印先, 如果入咗閘就冇得返轉頭, 冇得退稅o嫁啦～ 跟住就再去另一個 Counter 俾佢攪小小o野～ 跟住我哋就 Check In 入閘啦！(當時我哋見到勁多印藉定唔知咩藉o既人仕, 個個都一大嚿, 二大嚿 Samsung 大電視, 乜乜器材, 好似唔駛錢咁！！勁！但係由於我哋掛住退稅, 所以冇影低俾大家睇～

入咗閘之後, 又要行到大老遠到搵到呢個退稅 counter！！結果....... 行到斷腳, 我一心諗住有得退返百拎蚊稅！點知俾人扣咗一百蚊手續費！！得返果雞碎咁多...... 搵老襯o既！！！！

周圍行陣先！！又俾人偷拍, 但係反應勁快o既我已經擺定 Post 等佢影！hahaha
走去 D 免稅店行吓, 我又唔覺得好似外界所講到咁平o者.....  所以我乜都冇買到～

  

真係要走啦！！！！Bye Bye 啦！泰國！！

  


嚴格o黎講, 今次o既行程, 除咗時間上有陏動, 同埋早咗引致改動之外, 大致上都跟到～
泰國俾我o既感覺.......... D o野食好食, 國民有禮貌, 服務唔錯～
不過唔知點解, 我同 Eric 都有同感, 就係今次如果唔係有大皇宮同埋 Khaosan Road, 而只係純 Shopping 團o既話, 應該都會幾悶！！萬下手短時間內唔會再o黎添！人人都好鐘意o既 Central World, 我哋行咗都唔知有冇 15min 就走咗～
好開心, Eric 陪我行足全日 Siam Paragon 都冇嘈之巴閉！！！

而成個行程, 令我哋最滿意o既, 就係我 Plan 果咁多間餐廳 D o野都好好食！我哋又好彩, 揀o既餸, 碟碟都咁好味！真係冇一餐失過手, 呢個真係令我哋喜出望外！(不過人人口味唔同, 照跟行程o既朋友仔, 若果到時試過, 發現唔啱口味, 唔好鬧我呀～ hahaha！同埋由於我怕辣, 所以响 Order 食物上面, 都係揀 D 唔辣o既多, 鐘意辣o既朋友就要自己"針"著"針"著啦！)



～ 五日行程, 完結啦！！多謝各位收睇！！ ～ 

騰騰震！曼谷開心自由人之旅 18 Mar 2011 ( Day 4 )

可能琴晚落完一場雨, 所以天色終於都好返小小～ 實在太令人感動啦！！！！
如果你話同琴日調轉, 你話幾好呢！！！！

因為～ 今日室內係 Shopping + SPA 日！！！

今日天氣色咁好, 梗係o拿o拿聲影返幾張河景相先啦！！！幾靚！！！
  

話明係 Shopping 日, 咁就梗係 Hea o嫁啦～ 我哋 11 點拎起身, 施施然咁攪到 12 點幾至到 Siam Paragon ～ 曬到爆！

本來我哋都有諗過去水族館o嫁～ 但係得到朋友o既可靠消息, 話其實好細, 唔抵去, 叫我哋唔好o徒錢去～ 所以我哋就放棄咗啦～

於是我哋直接去 Manna 食個晏先～ 我哋 Request 咗坐窗口位～ 望出去真係幾靚～

   

  


叫完o野食, 我哋又周圍去影相～
呢度比我想像中靚～ 我好鐘意呢 D 古式古香o既吊扇o嫁～ ^^

環境優美、舒適、優雅、寧靜～

  

有o野食啦！不過名就真係唔係好記得啦～ 好彩有影到張單, 有得抄, 有得抄, hahah, 跟住再俾個近鏡大家認住啦～
分別係魚露生蝦 Shrimps w. Fish Sauce (真係好好味, 好爽口)、紅咖喱牛 Panang Beef 同埋肉碎粉皮咁款o既 Noodle Minced Beef！

  

  

不過有一樣失色o既係...... 我哋隔離枱坐咗兩位睇落似 Below 32 歲o既港女.... 真係港女...... 仲要唔知算唔算係無知o既港女.........

係咁大大聲講o野, 又話香港亞乜水帶咗我去呢度食飯, 亞物水又約咗佢去邊度玩～ 跟住又話邊條裙靚, 邊個名牌手袋靚, 又討論琴晚識果個條仔今日約佢去邊邊度～ 去唔去好, 今晚著乜好, 你去唔去呀？仲要話呢度 D 杯好靚呀～ D 碟好靚呀～ D 凳好靚呀～ D 燈好靚呀～ D 擺設好靚呀～ 碟  餸  o既  樣  擺  得  好  靚  呀～ (大佬...... 咪玩啦...... 前世未見過咩...... 你講到咁有見識, 我唔信你未見過囉...... 就算係, 你都唔駛周街話俾人知你真係未見過呀？同埋..... 有相睇.... 我同你食o既食物都差唔多o者～ D 食物o既外觀都好正常o者～ 請問有幾咁特別同幾咁靚呢！？)

我同 Eric 成餐飯都覺得相當之難頂..... 直情煩到我哋差唔多想轉枱！！其實你哋傾計, 真係唔緊要o嫁..... 問題係, 可以將音量收細嘛？我哋真係唔想聽你哋咁多o野囉！！

呢間o野都唔算平o嫁, 但係真係好好味！！後尾睇返書仔, 我哋至發現, 原來今次我哋係無心插柳咁點咗兩味佢哋o既推介主打菜式！！就係魚露生蝦 Shrimps w. Fish Sauce 同埋 Panang Beef 啦！大家可以去試吓～ 堅唔錯！

承為晒～～～ 食飽飽就走人啦～

大家認住呢隻木馬啦～～ Manna o既指標～

  



四圍行吓先～

     



俾人不停咁偷拍！！同一時間, 俾我哋發現果兩位靚女都一齊揀緊o野！速 Pit！

      

响 Thann 買咗小小戰利品, hehehehe

行行吓, 見到有 D 泰式小食賣, 10 銖, 買o黎試吓先～ 結果係....... 我哋一人食咗一啖就頂唔順, 掉咗啦...... 大家千祈唔好買o黎食！！相當之難食！！甜到嘔茄！！！

見到有炒雪糕, 食返杯先～

   


先好得意o既鴨鴨 Cake～                             桃味o既o即o即雪榚～ 我哋覺得一般般o者～ 得個凍字, 冇咩味～

  

响香港絕咗跡o既 "冬甩", 响泰國好受歡迎, 排晒長龍, 你哋睇到果一大堆人群嘛？

行去 Siam Square o既時候, 見到好多實 Q 哥哥～

聽營友講, 去 Customer Counter 攞返張 Card 有著數, 買o野會有折o嫁！買唔買o野都拎咗先！




呢度都有爉像館, 但係我哋冇去到～ 影返張相先, keke

Yeah！終於o黎到 Boots 啦！Eric 好好人咁由我行！呵呵呵！我好節制咁買咗小小o野就走咗 lu！

跟住我哋就返返去 Siam Paragon o既 Mandarin Oriental Shop High 返個 Tea 先！
好老實...... 呢間o野可以不去！間o野只係得個樣, D Cake 同 Coffee 都非常之一般！！！香港果間 D Cake 好食好多！！好失望呀！！我哋好後悔呀！

  

反而係配 Coffee o既 Cookie 最好味！( 吹脹 )

而跟住去咗唔可以唔去o既 Super Market 掃貨, 買薯片同手信～

跟住因為我要去 Big C 買藥膏俾老豆, 所以就同 Eric 兵分兩路, 佢拎返 D 戰利品返酒店, 我就去 Big C 買o野, 跟住再响 Ratchadamri 站等 ～

  


因為, 我哋今晚要去 嘆 世 界！！
RarinJinda Wellness Spa (8/F, Grand Centre Point Hotel)
** Book 咗 20:00 嘆世界 Parkage 如下: **
His First Spa Touch @3,500 2.5hrs @50%
Aromatic Hot Stone Massage, Guava Foot Polisher, Luxurious Facial Relaxation for men
Her First Spa Touch @3,000 2.5hrs @50%
Aromatherapy Oil Massage, Body Scrub or Body Mask, Guava Foot Polisher, Herbal Hot Compress

睇吓幾靚！！

  

開心o既時光特別快, 又係時候講 Bye Bye～ 時光飛逝～ 話咁快就做完 SPA 啦！
由於我同 Eric 都好梳乎, 所以決定唔行新開o既翟道翟通宵市場 (平時只係開星期六 & 日日頭), 我哋去咗附近 D 街仔度搵o野食, 買返酒店慢慢嘆就算啦～

呢個肥哥哥好有型o嫁～ 認到邊個叫先, 邊個叫後, 就算你加碼, 只要佢仲未燒完串串燒, 佢都唔會應你o嫁～ 你以為佢聽唔到？唔係囉～ 佢燒完佢就會睬你啦！

   

返到酒店, Eric 俾咗張 Card 我開門, 我一開門就見到咁o既光景！！！
佢竟然將 D o野好似骨牌咁鋪晒响地下！！！(放心！D o野食全部都係密封式o嫁！)

  

跟住我哋就將咁多日o既戰利品, 靚靚咁排晒上張床度影返張靚相啦～

待續 ～ Day 5 ～