過大禮吉日～

今日收到擇日師傅 -- 丁先生o既電話～

訂立咗我哋o既大日子之後, 佢就開始幫我擇緊攪其他o野o既日子啦～ (過大禮, 安床....etc)
仲話大概會响呢個禮拜就會約我見面, 俾份o野我啦！！

至於上頭, 出門時辰方面, 就要等 2013 年通勝出咗先至會俾到我啦～

佢俾咗兩個日子我, 分別係 30 Nov 2012 (Fri) & 09 Dec 2012 (Sun)

 最終我哋係揀咗 09 Dec 2012 (Sun) 成為我哋過大禮o既日子！！

睇住婚禮 D o野一件一件開始慢慢成形, 果種感覺真係唔知點形容, hahaha

我們的良辰吉日～

攪結婚, 首要就梗係要通知雙方屋企人, 同埋傾禮金同埋酒席先啦～
因為要過咗父母果關至可以做餘下o既動作～

其實响呢個項目上面, 我同 Eric 都有小小意見不合, 因為佢由細到大都係响外國長大, 思想比較西化, 同埋佢身邊有 D friends o既 Case 同我 D friends o既 Case 有唔同, 佢亦唔明禮金o既含意同埋其他細節上o既o野, 不過最後經過我同我屋企人o既磋商, 同埋同 Eric o既磨合, 佢最後都明白咗禮金同過大禮等等當中o既意義係咩。

而我屋企人好體諒我哋, 同埋鍚住我哋～ ^^ 
我要响度再三多謝父母對我哋o既體諒！！ 

响討論區 / 聽到有 D 朋友o既 Case, 真係嚇死人o嫁～！！同埋亦都唔明, 有 D 明明知道個女同未來女婿有困難, 都硬係要男家俾十幾廿萬禮金, 有一單 Case 係個媽媽講到明話其實問個女收咁多禮金係因為要留俾個細佬結婚用, 個女聽到真係超傷心........  最利害係聽過一個要俾 30萬禮金！！好驚嚇呀！！  不過唔知最後點收科.......

Eric 每當聽到呢 D case 就會好激動, 成日話家家都唔同, 冇得比, 唔通人地廿萬禮金, 我哋都照跟咩？佢有 D friends 有經濟壓力, 都試過係俾幾千至萬拎禮金啦！唔通我哋又照跟咩？

至於擇日方面, Eric 同埋佢屋企比較西化, 對於擇唔擇日都冇咩所謂, 至緊要係我哋鐘意就得啦～
但係由於我屋企比較傳統, 所以我哋決定擇日, 但求安心～

Eric 响擇日方面冇咩意見, 所以我決定搵返識咗好多年o既 Uncle 幫我哋擇日 (我哋差唔多年年都搵佢睇流年, 搬屋睇風水都係搵佢o嫁！人哋係家庭醫生, 佢就係家庭師傅 XD), 最理想就梗係星期五、六、日啦！

佢俾咗幾個日子我哋揀：

2013 03 29 (Fri)
2013 03 30 (Sat)
2013 07 27 (Sat)
2013 07 28 (Sun)
2013 10 24 (Sat)
2013 10 25 (Sun)

其實初初我哋都有諗過 7 月o既 (因為多數 D 酒席都會有折), 但係又驚太熱, 所以放棄咗～
我向 Eric 提議話不如十月囉, 冇咁熱又涼爽 D～

點知 Eric 突然話, 都係唔好啦, 都係 2013 年年頭好 D, 我問佢點解啦～
佢話：[ 因為 3 月份未過你同我o既生日, 咁張結婚證書o既年齡咪細一年囉！！！]
我：[ ................ 勁！！ 咁都俾你諗到！！！你係得o既！！！ ]

所以..... 我哋o既大日子將會係 2013 03 29 or 2013 03 30 啦！一個就長長久久, 一個就十全十美, 點揀好呢？( 我哋將會以酒席有冇期而落實大日子 )

最終決定～ 我哋o既大日子會係 2013 年 3 月 29 日！