千挑萬選, 終於都揀咗婚戒啦！！！！

近呢幾個月o黎, 我同 Eric 係咁去各大金鋪睇戒指。

好老實, Van Cleef & Arpels D 介指真係好靚好吸引！！！ 但係...... 實在太貴啦, 嚴重 Out Budget！！所以我哋唯有決定放棄....................

睇過晒周大褔, 六褔, 周生生, TSL....etc. 都唔啱心水～ 睇睇睇～ 結果我哋睇中咗 PN o既戒指！！但係問題又o黎啦！！！原來我有好嚴重o既選擇障礙困難症！
揀咗好耐, 周旋咗好多, 反反覆覆睇完又睇, 睇到我一行入鋪, 個 Sales 姐姐就已經問我係咪想睇返上次睇過果兩隻～  可想而之我睇過 and 煩過 Sales 姐姐幾多次！佢冇黑我面已經算係咁！    當時 Sales 姐姐話o黎緊會加價, 但係未知道係婚紗展前定後加～

我哋都有諗過好唔好即時係鋪頭買, 但係基於唔知佢係咪吹水, 同埋鋪頭送果個首飾盒唔夠吸引, 所以我哋決定入婚紗展, 睇吓多唔多o野送, 再決定鋪頭買定係婚紗展買～

為免 PN Counter 多人等得耐, 我哋特登早 D 入場, 第一時間殺去 PN 揀戒指！
結果我哋發現, 佢哋真係加咗價！！！！換言之我哋相隔咗兩個禮拜就買貴咗啦！！  

今次婚紗展o既禮品係：
戒指盒 + 戒指枕一個 + 全數九折 + VIP

而鋪頭係：
細細個o既首飾盒一個 + 第一隻滿五千蚊, 第二隻可以有九折, 但係我朋友有 VIP No. 所以可以全數九折～
最後, 我哋決定响婚紗展買～

我又係度試咗好～～～～～～～～～耐 (Sales Maggie 都冇面黑, Very Good！！) 而 Eric 都出現咗選擇困難障礙, 我哋決定等埋另外一 Pair 朋友o黎再俾意見, 結果係大比數勝出！
一對準結婚戒指順利誕～生！！

保持小小神秘感, 唔 Post 婚戒相住, keke 

酒席場地‧港島區 (側魚涌)

睇書仔, 見到美心有間八月系列, 所以去睇吓～

鰂魚涌八月芳 -- 其實入到去第一個感覺真係一般般, 覺得場地比較細 ( 佢 Max 擺到 20 圍), 但係勝在樓底夠高, 同埋比較西式, 仲有好大盞水晶燈, 好靚～～～

至於新娘房就俾佢 D 雜物堆滿咗, 入唔到去睇, 只係覺得應該 OK 夠大, 勁大就一定唔會係啦～～ 擺唔晒 20 圍, 擺晒應該會迫爆！場內會有一圍做自閉仔, 因為有三幅落晒地o既壁櫃响度會遮到, 客廁格得三格。

但係 Eric 似乎好鐘意呢個場, 佢已經決定將呢間入選 "睇定 D 後選行列" 啦！！

真開心, 又有多一間入選 "睇真 D 後選行列" 啦 --- 八月芳！！

酒席場地‧港島區 (中環、金鐘)

我哋响美心 D 婚宴場地宣傳書仔度, 見到呢兩間都幾靚, 所以再出擊！

1) 中環大會堂美心皇宮 -- 堅靚！！華麗！樓底高又光猛！！夜景一流 (咁梗係冇佢張宣傳相影得咁靚咁光咁清啦～～)！新娘房都夠大o既～ 由於我哋得 20 圍, 所以唯有簡個細場"榮華大禮堂"俾我哋～ Min Pay 唔算貴 @ HKD148,000 / 開到 20 圍就可以包場～

但係..... 其他o野實在太"拿利", 好多o野都唔包！唔包 Parking, 唔包西式 Back Drop (只包中式大龍鳳, 其他o既唔該自己攪掂佢), 最離譜就係竟然個台係要俾 HKD1,600 租~~~~用佢個台 , 否則就冇得用個台！！！出面間間都會係俾埋個台你用o嫁啦.... 都係第一次聽要俾錢租！！

仲有好多好多o野都唔送........席前小食唔包！唔包花車！唔包結婚蛋糕 (食得o既)！什果賓治承為你 HKD1,200.00 一煲！！  雀片"優惠"！！每檯 HKD60.00！ 最後..... 竟然連無線咪都要俾 HKD300.00 租......  
另外, 主家席係一位同事負責, 客席就兩位同事睇三檯, 仲要客席唔包分菜, 分菜要加錢！！！！！！


我同 Eric 真係越聽越驚心！ 其實陳經理態度又唔係串, 只不過係講野好 firm 果隻囉～ [係咁話, 我哋做法同出面果 D 唔同囉～如果我俾你 R 到優惠, 即係我本來 Mark 貴咗你] 俾佢激死......  咁我都認同個場真係唔錯o既, 我相信食物亦有一定o既保證～～

但係有一樣好攪笑, 就係陳經理話, 佢哋有八款凳, 同五款飲宴器皿。我哋初初以為係俾我哋揀啦, 點知！！原來唔係o既！！凳同埋器皿係會隨意咁擺方响會場內, 冇得話想統一晒只擺一款o既！！  (不過果隻唔統一o既碟會係入席o既時候收走)

基於以上種種原因, 我哋唯有放棄 --- 大會堂美心～   OUT  (但係如果其他 Blog 友覺得場地要緊, 錢唔係問題的話, 呢個場地都真係好唔錯吓！！)

 
2) 金鐘和記大廈潮庭 -- 其實場地都靚o既, 新娘房 OK, 可惜樓底比較矮, 同埋經理話佢和記大廈將會响 2012 年裝修, 所以唔接 2012 年年尾至 2013 年年頭o既訂單住～ OUT

究竟我哋幾時至可以搵到一個真係啱心水o既地方呢！？！？！？！

酒席場地‧九龍區 (紅磡、黃埔、佐敦、旺角)

紅磡區

國際都會景逸軒 -- 位於酒店裡面, 樓底都夠高, 新娘房果 D 都 OK o既。先講一講個門口, 酒店大堂入口就當然靚爆啦, 條樓梯好靚～ 仲送酒店一晚, 相當之就腳。但係另一個由商場入果個門口就差 D 啦！！一定一定一定要洗錢佈置！！大吉利事講句, 真係差兩個白色燈籠o者, 真係勁似以前 D 大宅門辦緊事咁 (我一見到就已經唔鐘意) ....... 仲有四五座好似貞節牌坊o既物體...... 總之我就唔想 D 賓客經呢邊門口入啦！(但係又真係好難控制個喎～) 另外, Eric 唔鐘意會場太過四通八達, 驚會令到 D 賓客同其他食客易引起混亂～ 所以決定 OUT

國際都會煌府 -- 海景廳, 真係幾靚, 樓底 OK, 新娘房夠大, 有鋼琴包埋添！！屬中規中舉之選。鑽石廳, 都唔錯, fit 到我哋圍數, 樓底 OK, 新娘房都夠大, 自成一角 D, 咁就梗係冇海景廳個景咁靚啦。但係唔知點解咩原因, Eric 對呢度冇乜特別想响度擺酒o既感覺, 所以 OUT

黃埔區

博藝會 -- 4/F 帝皇廳, 樓底唔算高, 但係都 OK, 場地夠大, 場地佈置都 OK, 有條疑似雲石樓梯通往 4M/F 都幾靚, 但係新娘房就真係唔係好掂啦, 感覺上好似去咗長洲度假屋咁, 仲話係新裝修添！！  至於 4M/F 宴會廳, 樓底同 4/F 一樣, 場地大過帝皇廳, 有水晶燈！仲有鋼琴包添, 但係想彈就要另外俾錢啦！！！！(冇記錯好似係 5K), 但係新娘房同 4/F 一樣..... 我真係好懷疑佢用咗幾多錢去裝修！！

會所模式, 場地係 OK o既, 但係上網睇過 D 人話食物質素參次, 同埋 Min Pay 方面, 2012 年加 10%, 2013 年加 20%, 真係要等佢出真 D 價錢再考慮。不過我哋都覺得佢可以入選睇真 D 後選行列。

 
佐敦區

1) 佐敦欣宴 -- 位於 Novotel Hotel 隔離, 入口就差咗小小, 但係場地真係唔錯！！樓底好高, 個台都唔錯, 新娘房夠大, 幾靚～ 場地夠大, 我鐘意呀！！！！但係要 24 圍至包到場！！ (被收皮) OUT

 
2) 佐敦彩港國宴 -- 位於彌敦道大馬路邊, 環境各樣都 OK, 咁梗係唔夠欣宴靚啦！樓底唔算高, 但係都 OK。用 Cat Walk 天橋, 問題係冇得好似皇府咁可以升降, 而係一個梗咗o既台, 呢方面我有小小唔鐘意, 因為即係變相個禮堂擺抬迫咗！不過我哋都覺得佢可以入選睇真 D 後選行列。

 
旺角區

朗豪坊八月軒 -- 我哋期待咗一段時間o既八月軒終於都開幕啦！！點知.... 超失望！！！佢大堂位置只能擺到 16 圍, 其他o既只能夠擺响個台後面！！！！仲要係屈咗入去偏廳, 望唔到個台果隻, 仲要係左右各幾圍喎！D 燈又唔夠華麗！唉.....唔開心！ OUT
Eric 响佢未裝修好前, 入過去影過幾張相, 我又俾你哋睇吓先～
大門口入去, 最尾一格格果個係擺 Back drop 位置, 再由左右兩邊入去仲可以擺放幾圍。

Back drop 後面左邊o既廳

Back drop 後面望入去右邊廳o既情況

今次入選 "睇真 D 後選行列" o既有 -- 佐敦彩港國宴 & 博藝會！！

酒席場地‧九龍區 (觀塘、尖沙咀)

本來我都有揀到 "九龍灣鴻星海鮮酒家" o既, 點知媽咪一聽到原來响淘大裡面, 已經 Say No, 所以我同 Eric 都冇去睇場 ( 但係睇佢網站 D 相, 好似幾靚咁個喎  )

Eric 唔鐘意 Mega Box 同九展因為唔就腳喎, 所以我哋今次主要都係特登去睇鱷魚恤中心 D 酒樓, 同 Club One～

觀塘區

1) 鱷魚恤中心玉桃苑 -- 我响度飲過一次茶, 食物係唔錯o既, 場地都 OK, 都夠光猛, 好可惜係....... 一望出去, 全部都係工廠景！大打折扣！！ OUT 我哋亦預計同一座大廈望o既方向都係一樣, 所以都冇再睇其他啦！

2) Club One -- 樓底都 OK, 新娘房好大！！但係場地冇想像中咁靚, 同埋開晒燈都唔多夠光, 再加上招呼我哋果位姐姐仔服務唔係咁好..... 所以留下唔係非常之好o既印像！ OUT

3) 源成中心鴻星 -- 睇佢個網 D 相不錯, 估唔到未入到去, 响門口望咗一眼就已經俾我哋 OUT 咗！個樓底矮到爆！！！！


結果是次一心特登o黎睇觀塘之旅, 全軍覆沒, 慘敗而回, 仲慘過銅鑼灣 & 灣仔！！見仲有好充裕o既時間, 拿拿淋轉戰第二區！
 

尖沙咀區

1) 香港文化中心映月樓 -- 好老實, 入酒樓果個樓梯位真係唔錯, 响果度擺酒又可以去 1881 + 海傍影相, 加上我哋去睇場果日天氣又好, 堅靚！！！！我哋擺 20 圍, 經理介招咗個 L 型場俾我哋, 我哋唔鐘意........ 佢再帶我哋上樓上果個場睇, 四四正正, 望海, 樓底都 OK, 新娘房都 OK, 我哋鐘意呀！！！！ 但係可惜呢個場又擺唔晒咁多圍, 我哋唯有放棄.... 如果唔係, 呢個場都係必定入選o既場地之一！！

3) 星光行北京樓、翠園 -- 樓底太矮, 多柱, 比較舊式～ OUT

4) 海港城鴻星 -- 係 D 討論區睇過評語話幾好, 同埋睇過 D 相都 OK, 咪去睇吓囉, 點知....中  咗  伏........ 佢要經過晒大堂 D 食客, 再入去簡場地方, 超～～～～～長方形, 如果擺 20 圍, 我諗我哋同最遠果圍賓客真係有唱山歌咁o既感覺～ 好懷疑佢哋睇唔睇到變咗豆豉o既我哋   另外佢哋個台o既佈置好簡單, 唔多啱我哋心水～ 呢間o野, 唯一o既優點係全海景～ OUT

5) The One 迎 -- 講真, 場地真係不錯, 又四正, 全海景, 樓底又高, 個台又大, 新娘房又大, 不過 Min Pay 都唔小o野, Sat & Sun 要 180K 包場～ 咁都明o既, 一分錢一分貨嘛～～ 佢個基本佈置差唔多 = 佢o既基本裝修, 佢個蝴蝶 Back drop 係特別, 但係如果你唔用佢個 Back drop 就必定要自己出去搵公司攪, 同埋佢好多o野都唔包, 太多跟尾錢啦！！條數有排計, 唯有忍痛 OUT

6) The One 煌府 -- 吳剛師父親身帶場, 場地唔錯, 夠浮誇 ( 我鐘意 ) 樓底高, 四正, 全海景, 新娘房真係好大, 但係因為唔夠圍數, 只能包佢個皓月廰 (Min Pay 160K), 有朋友擺過, 話皓月廰擺 20 圍會比較迫, 冇咁靚～ 但係我哋又要唔晒星願廰 (Min Pay 220K), 同埋聽聞而家煌府集團好似差咗?? 所以要考慮考慮～

7) The One 利寶閣 -- 場地都唔錯, 四正, 樓底高, 新娘房 OK 啦, 都係全海景, Min Pay 168K 包場( 呢個價錢我不如擺煌府 ), 但係姐姐仔 D 口吻聽落應該仲有計傾, 同埋都幾多o野送咁！但係唯獨係可惜在佢果排～～～ 波浪形一條條o既水晶柱燈, 原來我同 Eric 都唔鐘意！！未開燈果陣真係超娘, 開咗就好小小啦～～ 走得！！ OUT

 
8) The One 東海 -- 明明同一座 Bldg, 都唔明點解會整個咁o既則出o黎！！佢右邊果個場還好, 樓底高, 夠光猛, 全海景, 但係新娘房就一般般啦～ 而佢再入面大 D 果個場地就要經過廚房, 唔知係咪太新呢, 仲好似有小小立立亂咁, 擺晒 D 執碟車仔係走廊度, 如果擺酒果陣都仲存在, 都咪話唔眼怨～ 

另外, 接待我哋果位姐姐仔超唔 Pro, 乜都要問人, 咁好心你就射我哋俾 D 話得事o既同我哋傾啦！！

 


呢行長拉拉o既係要o黎擺雀區, 亦都對住新娘房

最大問題係呢個位係未擺地台, 擺埋咪即係個場會窄好多！？

我同 Eric 都覺得, 東海o既設計根本係o徒咗一個原本咁好o既則！ OUT

終於都有一間可以保留, 加入睇真 D 後選行列啦！

就係........ The One 煌府！！

酒席場地‧港島區 (銅鑼灣、灣仔)

其實我哋果日行咗好多地區, 我將佢哋分區 List 出o黎會易睇 D ～～

灣仔區

1) 合和薈軒 -- 樓底 OK, 個台都夠大, 新娘房都幾好, 價錢都 OK, 但係硬係唔知點解, 做唔到我哋o既 Mr.Right！另外因為佢個廰比較大, 所以要簡場 OUT

2) 合和帝廷皇宮 -- 其實門口同樓底都 OK o既, 但係好似唔多夠光, 同埋唔知點解, 硬係唔多鐘意, 加上都係要簡場, 所以又唔諗啦～ OUT

3) 桃園酒家 -- 本來都冇諗過睇呢間, 有日放工經過上去睇過, 實在 "驚為天人", 唔多啱我哋心水, 詳細o野唔講啦～ OUT
 

銅鑼灣區

1) Times Square 玉桃苑 -- 樓底夠高, 可惜場地三尖八角, 唔啱心水, 加上佢話 2012 年裝修, 所以唔接 2012 年尾 - 2013 年頭o既酒席住～ OUT

2) Times Square 鴻星 -- 樓底夠高, 但係我哋只係擺 20 圍, 所以要簡場, 同埋唔知佢門口張地毯發生咩事, 好似倒瀉水咁, 勁多 & 夠大撻漬係地下, 超級唔掂！！ OUT

3) Times Square 洞庭樓 -- 純粹路過入去睇吓, 真係好靚！！！西式歐陸 feel, 可惜.... 唔夠擺 20 圍 OUT

4) 利舞臺麒麟閣 -- 呢間本來係 Eric o既推介, 佢話呢間o野 D o野食係 OK o既～ 麒麟閣啱啱裝修完, 未裝修前都 OK, 但係佢裝修咗之後, 我同 Eric 都唔鐘意佢個教堂 Backdrop....  但係都認同佢係屬於中規中舉o既選擇～ 不過最後都係.......  OUT

5) 利舞臺玉桃苑、利寶閣 -- 樓底唔夠高, 場地四正, 但係冇咩特別原因, 總之就唔啱心水啦！ OUT

6) 利舞臺譽宴 -- 場地靚, 樓底高, 有雲石梯, 真係幾靚！！但係...個新娘房要走上走落, 我驚到時會攰死！！另外, 要廿幾萬 Min Pay, 我又擺唔到咁多圍, 貴到飛街... =_=  OUT

7) 利舞臺 Cha Cha Moon -- 本來我同 Eric 都幾鐘意呢個地方, 仲想 ignore 咗佢樓底矮o既問題！因為可以用晒佢個大堂, 擺到好多相, 又有別於一般酒樓, Min Pay 同菜單都合理, 仲好似好多o野送咁～ 我哋亦都分別去過幾次, 視察過有婚宴時候o既擺位～ 不過好可惜佢始終都唔係專做婚宴o既場地, 開晒所有燈對於我哋o黎講都係太暗啦！！！！ OUT

8) 皇室堡彩福皇宴 -- 樓底唔夠高, 個台都夠大, 幾靚, 但係佢 D 燈太多一條條柱狀o既疑似水晶柱, 我同 Eric 都唔鐘意！ OUT

9) 皇室堡景逸軒 -- 樓底唔夠高, 但係有個空中花園可以證婚, 感覺良好, 唯獨係覺得睇相版時, 覺得佢 D 裝飾唔夠靚, 要自己再俾錢攪攪佢～ 同埋又係要簡場, 所以.... 又 OUT

10) 世貿 -- 上次係婚紗展見過世貿擺 EXPO 行過上去睇睇, 其實場地都唔差o既, 但係實在太唔似婚宴場地, 所以又 OUT

11) 翠園 -- 場地靚, 樓底都 OK, 可惜係擺唔到 20 圍, 無奈地 OUT

結果...... 經過我哋返屋企密密針之後, 呢兩區o既酒樓, 全 OUT！！！！點會咁o嫁！！

Confirmed Pre-Wedding！！！

o黎到 2 月份o既婚紗展啦！！2 月12 日, 我哋終於都 Confirm 咗我哋o既 Pre-Wedding 公司！！！

佢就係 "香港現代經典" 啦！！我哋係決定影澳門o既！

我同 Eric 每逢諗起 "香港現代經典" 就好想大笑, 因為响我哋 Confirm 用邊間之前, 我哋已經睇過及同佢哋磋商過三四次, 睇到個 Sales 都認得同埋都驚咗我哋, 但係佢每次都會好 Nice 咁招呼我哋o既～

由於我同 Eric 都鐘意小小歐陸風情, 我哋 Join 咗 E1008-C 澳門萊斯酒店 (80檔)  @價錢 HKD12,980.00 o既 Package, 包酒店同埋早餐, 會由澳門現代經典負責幫我哋化妝同埋影相 (如果想指定香港/澳門某攝影師, 就要另外加錢), 至於所有揀相同後期製作, 都會係由香港現代經典跟返～

大家緊記, 要留意, 深圳現代經典並唔係同佢哋有關係o既公司！！只係個名似o者！

So far 我好努力咁搵呢間公司有冇 D 咩負面新聞, 都唔知係好事定唔好事, 我係搵唔到o既～ 同埋佢都唔算話好多資料俾我搵得到, 反而深圳現代經典就大把資料搵到！！

好慶幸哋, 係 Yahoo Blog 叫做搵到多 D 用家o既資料, 多謝晒咁多位 Blog 友無私o既奉獻！！