中西式喜餅

呢個項目基本上係唔駛點諗o既, 只要計數就得啦！

西餅

一早已經決定咗買美心, 所以 3月份果個婚紗展一見到有美心, 就即刻狂 Call 幾個準備結婚o既朋友, 班人頭買餅 Card！！

果次計埋美心送o既餅 Card + HKD100.00 現金券, 已經等於 7 折！仲平過 Staff 價！！超抵呀！！！ 我夾埋朋友 Total 買咗 300 張餅 Card, 裡面有 160 張係我o既～

7月發現數漏咗麻麻果邊 D 親戚, Eric 搵朋友 (美心 Staff) 再加買咗 50 張～

唐餅

我只需要買 10 張俾麻麻 D 大陸親友, 4 張係過大禮用, 由於我唔熟呢方面資料, 就拎晒 D 單張返屋企比較, 睇吓邊間抵 D ～ 跟住再入婚紗展再比較有咩著數～

美心 -- 買 10 張起有八折, 八折後, "精選禮盒" 每張 @ HKD54.40, "尊貴禮盒" 每張 @ HKD86.4 最貴 (OUT)
奇華 -- 有八折, 八折後, "金盈喜禮盒" 每張 @ HKD41.60, "金緣喜禮盒" 每張 @ HKD86.4

恒香 -- 係 Sogo Counter 見到個牌仔寫住買五張以上, 用恒生 Card 有 7 折, "展翅雙飛"禮券每張 @ HKD33.25, "鴛鴦成雙"禮券每張 @ HKD50.40 (激平！！)
榮華 -- 有八折, 八折後, "精裝四喜禮盒" 每張 @ HKD41.6,  "六個裝禮盒" 每張 @ HKD70.4


其實理應揀恒香, 因為最平！！但係聽講佢好似欠緊薪, 所以都係唔好博啦～ 一陣買完派餅果陣至o黎出事, 我咪訓係度！！

咁即係只係有 奇華 同 榮華 揀！

初初一心諗住買奇華 (用 Enjoy Card 扣 Cash / Enjoy Dollar), 但係 16/7 去到婚紗展睇實物, 就覺得榮華大體 D～ 同埋奇華只係得個八折, 冇其他優惠～ 麻麻哋吸引～

當日係婚紗展買咗榮華, 有八折, 夾埋朋友買咗 44 張！我佔咗 14 張, 10 張 "精裝四喜禮盒" 折咗每張 @ HKD41.6  + 4 張 "六個裝禮盒" 折咗每張 @ HKD70.4 ～

婚紗展優惠買滿 HKD600 有個細細隻袋仔送, HKD1200 送兩個細細隻袋仔 + 紅傘一把 (個款 ok 啦, 我諗住要黎出門用兩野咋嘛～), HKD1800 送三個袋仔 + "傘 or 龍鳳對餅兩對"！！

由於朋友話 D 禮品佢唔啱洗, 所以俾晒我揀！！多謝亞 Ling！！！！

初初我要求話唔要 D 袋仔 (個袋個款....喜歡與否...因人而異, 我就麻麻哋個袋個樣...), 我想要把傘 + 龍鳳對餅, 但係佢係都唔肯, 仲話如果我想要把傘, 叫我用 HKD68.00 買佢返屋企...... 玩o野咩～ 我就係想慳錢至叫你送咋嘛！HKD68.00 我駛鬼買你咩～ 出面大把都靚過你啦！！

結果我唯有要咗個三個袋仔 + 龍鳳對餅兩對～


勁開心呀！！本來諗住要另外買兩對"龍鳳對餅"o黎過大禮用, 結果而家慳返 HKD110 (一盒 HKD55)！! Yeah！！佢 D 餅券係永久通用o嫁～ 

終極酒席場地 -- 博藝會！！

終於決定咗我哋大 Project o既地點啦！！
响琴日 16 July 2011 o既婚紗展, 我哋正式落咗訂啦！
我個師傅擇咗日俾我, 本來我想揀 Sat o既, 但係...... Friday 計落 Total 可以慳萬幾蚊！！(傾到出晒牙血...) 為咗減輕未來老公o既壓力, 所以最後我決定, 忍痛擺 Friday！！！(Eric～ 你睇我幾體貼你吖～

 記住要鍚晒我呀～～)

我哋擺酒o既地點會係黃埔o既博藝會 -- 帝皇廳！！

大日子會係 2013 年 3 月 29 日！

同大家講返中間段小插曲先, 本來係二選一, 博藝會 / 美心集團 "八月芳" o既～
話說六月尾去咗太古坊o既"八月芳"食飯, 仲 Pencil mark 咗 29 & 30 兩個日子, 話會去婚紗展傾, OK 就會落訂, 個註場大經理話冇問題個喎！話會幫我 Hold！我親眼睇住佢寫落大簿, 話 Hold 到 7月o既婚紗展。

我 10/7 打去問佢婚紗展 D 資料 & 有咩優惠, 我冇表明我係乜水, 仲問佢 29 / 30 號仲有冇期～ 點知！！！佢竟然答我, 29 號俾人 Book 咗啦, 得返 30 號咋～ 果吓真係嬲到我爆呀！！！！你明明話 Hold 俾我, 就算有人 Book 呀, 你有咩理由唔通知我就接 Booking 先！乜你做人咁冇口齒o既咩！？！我不知幾想小佢！！我忍佢！因為仲有 30 號可以揀！我即刻叫佢幫我 Hold～ 佢呢一刻就醒覺, 反問返我係咪果日食飯叫佢 Mark 低果位X小姐, 我話係～
我心諗, 如果去到婚紗展真係決定落訂o既時候, 佢話我知冇咗, 我真係會鬧爆佢！
跟住我話我哋冇飛, 想叫佢帶我哋入婚紗展, 佢好客氣o既語氣, 好似真係好困難咁回應：[你呢個情況, 要買飛喎.....我哋公司只係會帶落咗訂o既客人入場個咋喎...]  我心諗, 你咪玩我啦, 亞大經理～ 帶兩個人入場有幾咁難呀！！
我話：[咁我哋都係想入場同你哋傾吓個菜單, OK 我哋都會落訂o嫁啦～] (呢個係事實)
跟住佢叫我等一等, 好快咁好似想回應話 OK, 但係突然又話：[真係唔得呢～ 我哋真係只可以帶落咗訂o既客人入場o嫁咋～] (我 D 火開始o黎) 我話：[今日係星期日, 我而家係屋企, 而家時間係夜晚 10:30, 我就算想落訂, 你話我應該點落訂, 你先至可以帶到我入場呢！？] 跟住佢至叫我留低電話, 由於佢唔會落會場, 到時會叫個副經理聯絡我哋。
個經理攪到咁, 我已經唔想揀 "八月芳", 因為我覺得佢哋冇信用, 冇口齒！！二來我覺得佢真係好冇誠意, 大佬, 我見都見過佢幾次, 飯都特登同屋企人去食過兩次, 佢同埋幾個經理都認得我哋個喎！！我真心諗住入場傾酒席, OK 就落單, 你唔係連果 HKD20 都要唔肯豪俾個極有機會落訂o既客人呀！？重點係, 佢哋其實唔會蝕呢 HKD20, 佢哋只需要 Show Pass 就可以帶人入場！佢咁都唔肯！因而令客人有唔好o既印像！！呢 D 咪叫做因小失大囉！！
同一時間, 我亦打咗俾博藝會, 問佢可唔可以帶我入場, 人哋不知幾咁 Nice Nice 話冇問題, 仲叫我哋到咗就打俾佢。

15/7 我收到副經理洪生個電話, 仲約咗 16/7 入場打俾佢, 結果.... 當日佢太忙, 聽唔到我哋電話, 我哋唯有叫咗另一間我哋已經 Join 咗o既公司帶我哋入場, 入咗場佢至打o黎......... 咁我都知呢 D 係意外o黎o既.......

入到會場, 我男友決定俾多次機會"八月芳", 睇吓佢哋個 Menu 係點o既, 八月芳副經理好似唔懮做咁, 又話而家送o既o野, 到 2013 年又唔一定會送, 咁我哋咪問佢, 咁你話 Menu hold 唔到, 送o既o野又 hold 唔到 (e.g. 回門豬, cake, 車, 酒店....etc, 總之 2013 年有無限o既變化, 無論而家 2012 年話包乜送乜都有機會會變) 咁請問我落訂為咩呢？同埋你張單會寫咩呢？！

佢竟然答我: [ 你 Hold 到個場地同日子囉～ ] 我同男友都心諗: [ @$!%^#&(#^#(#!!! ] 如果我只係要 Hold 場同日子, 我駛鬼 Hold 你咩！！！！！副經理仲好似覺得冇問題, 好應該, 佢不斷強調咗幾次 [ 美心集團唔係只係做你哋一單生意, 而係香港所有人o既生意, 所以價錢上加起上o黎係唔會亂o黎～ 你可以放心。 ]

仲叫我哋可以再去周圍睇吓其他先～ 比較吓～ 真係火都o黎埋！！！總之你只係俾咗個訂, 但係乜都未知, 對消費者真係好冇保障！咁咪即係我落咗訂就任你劏！？ BYE BYE！！！！！

我 知～～ 你 大 集 團, 唔 志 在 我 呢 D 十 幾 廿 萬 o既  生 意 仔～ 大把客任你揀～～～ 咁你慢慢揀 & 等飽佢啦！！！！！

就係因為佢咁唔爭氣, 所以我哋有確實目標 -- 博藝會！

Pre-Wedding 特別嗚謝篇

响呢度真係特別多謝跟我哋張單果位香港現代經典 Sales -- Joanne, 佢都算係咁, 因為我哋覺得佢張單 D 細節位寫得唔夠仔細, 同埋我哋都算早 Book, 又驚到到 2012 年影相果陣會唔記得 D 細節, 所以自己做咗張 Summary 俾佢, 叫佢跟跟眼, 同埋幫手確認返。

點知佢公司死人都唔肯, 而 Joanne 就好好人, 都有幫我哋 follow 同埋同公司講, 而我同 Eric "揭"而不捨o既精神, 三月同六o既婚紗展都有去佢哋 Counter 詢問及跟進, 有次去開 TST 都有去問問進度。

臨尾仲去埋佢哋鋪頭同埋佢上司一齊傾掂佢, 果晚仲由 7:30 攪到 11:00pm, 加上 Joanne o既幫忙, 件事都叫做完滿解決咗～

我同 Eric 仲成日講笑, 話萬下手佢哋公司以後都唔會再接我哋o既單！！呢 Pair 客實在太麻煩啦！！！

希望, 我哋會影得順順利利, 無煩惱, 一 Take 過攪掂啦～

亦都希望我可以响後期製作再大大力咁多謝你啦～ keeekkeke

終極婚禮攝錄

再同果兩間公司磋商完之後, 我同 Eric 再密密針, 大家心裡面都已經有所決定。

28/6 我再打俾 Miracle 約 1/7 再上去佢公司度再傾傾細節, 其實應該係話特登上去落訂。

最後我哋決定聘請 Miracle Production 為我哋o既 Big Day 攝錄！！！希望當日一切順順利利啦！！

落單果陣, 老世 Miracle 話, 我哋係最後一 Pair 享有六月份未加價o既準新人！我果陣至醒起, 係喎！！！係 Facebook 度, 佢哋話 7 月份開始加價啦！！我都唔記得咗添！！好彩o者！！kekekekeke
o黎緊 15/7 - 17/7 佢哋都會擺婚紗展, 有興趣o既朋友, 可以去睇睇呀～

題外話, 其實我冇諗過最後會揀 Miracle Production 做我哋o既 Big Day 攝錄, 一來 Out 晒 Budget, 二來係其實之前都睇過呢間公司好幾次o嫁啦, 第一次接觸佢, 係 Feb 2011 o既婚紗展, 果次又係 Eric 唔得閒要早走, 得我一個人周圍睇酒席資料, 行過佢哋個位, 我俾佢哋條 Film 吸引咗, 我好鐘意！！而我知道 Eric 都係好鐘意呢類型o既產品, 打算下次再帶 Eric 睇佢哋 D o野。

第二次, Mar 2011 婚紗展, 我特登帶 Eric 去睇條 Film, Eric 都好鐘意, 睇睇個價錢, 點知佢哋加咗價, 價錢實在太...... 同埋本身我哋亦冇預算到呢個項目, 所以冇 Join 到。(之前招呼我果位 -- 好有 Heart 拍片o既導演哥哥竟然認得我)
我都以為與呢間公司無緣o嫁啦～ (最攪笑係, 同日, 我哋 Join 咗另一間婚紗攝影後, 去抽獎, 獎品竟然係佢哋公司o既 Slideshow！果陣仲覺得抽中咗都幾諷刺..... 仲諗住冇用, 想掉咗佢, 但係諗住係免費o野, 所以 Keep 住先！點知原來一切都係有主宰o既！！點解唔係現金券呢～～～ hahahah)

第三次, 即係今次, 其實我只係路過佢個位, 順便睇一睇 D 相同埋聽一聽佢哋個 Package 細節 + 價錢, 多個比較, 同埋佢哋 D o野係有質素o既。

勢估唔到, 我哋o既 "Big Day 攝錄", 最後竟然會係佢！

再次接觸進行磋商

四強誕生之後, 我係咁上網搵佢哋 D 資料, 但係好可惜, 唔知係咪而家實在太多太多攝影公司, 我哋揀果四間, 都唔算有好多人講過, 最多人講過o既係應該大家都好熟悉o既 Joseph Photo, 而 For Star Production 都有人用過, 但係冇咩特別講 D 咩。

經過我同 Eric 重覆再睇過果四間 D 相同 Video 之後, 決定最後有得留低o既最後兩強係：

1) For Star Production House  www.forstarproduction.com / http://www.facebook.com/forstarpage

2) Miracle Production http://www.miracle28.com / https://www.facebook.com/home.php#!/MiracleProduction

我哋再約咗上佢哋公司睇其他相版, Video 同埋再傾傾 D 細節, 睇得出呢兩間公司都好有 Heart 去影相, 而 Video 方面, Miracle Production 同平時果 D Same Day Editing 唔同 D, 感覺出色 D 同埋有故事性 D。

傾談當日, 我哋都冇決定到用邊間, 因為真係各有所長！好頭痛！！

婚禮攝錄大比拼

其實呢篇文應該係早 D Post 出o黎o既, 但係由於我懶..... 所以攪到而家至 Post, kekeke

响六月份果個婚紗展, 我哋主打都係睇 "酒席" 同埋 "婚禮攝錄" o既資料, 估唔到, 而家 D 攝錄係貴咗咁多, 到目前為止, 呢兩個 Item 都未有定案, 唉～～～～

初初睇咗間, 我同 Eric 都好鐘意o既, 叫 "Wish" 佢 D 相真係好靚！！！係我哋想要o既o野！坐埋位一睇吓 D 價錢.....嘩！！！仲靚！！ 2P 1V 要 29,XXX！！

超級無敵嚴重 Out Budget 所以放棄咗啦～


由於當日 Eric 有事要走先, 所以留低我响會場孤軍作戰！！我非常之努力咁揀選啱我哋心水o既攝影公司, 跟住再拎返去同 Eric 相討, 第二日再帶 Eric 入場睇相簿。

响揀選其間, 我遇到一間令我相當之不愉快o既公司, 就係金都o既 "專業製作"！
初初招呼我果個哥哥仔態度良好, 都有問必答o既, 點知突然間有個 Sales 姐姐走埋o黎叫咗佢去第二枱幫手, 就轉咗由果個 Sales 姐姐招呼我, 佢問我幾時係大日子, 佢一聽到我話 "仲擇緊日子", 就似覺得我係混吉咁, 仲俾晒面口我睇！有問必唔答 (求其答)！嬲到我吖！跟住仲話, 不如你擇咗日再慢慢揀攝影啦～ 

我心諗：唔駛啦, 就算有日子, 我都係唔會揀你o既！你已經跌咗落 99 層地獄, 永不超生啦！！！

(好彩後尾上網睇返, 原來呢間o野係出名o既黑店, 好彩冇揀o者！！！我應該多謝呢個 Sales 姐姐, 令我咁反感而避過一劫唔揀佢。)


好, 講返正題先, 我哋目標都係 "2P 1V" 俾我嚴厲咁揀選完後, 以下落o黎, 係我哋o既後選攝錄佳麗 (排名不分先後)：


Within Budget o既有：

1) 純美新娘 -- 小寶
2) Amazing Grace 星映傳情 -- Gracehttps://www.facebook.com/home.php#!/pages/Amazing-Grace-Productions/92682689163


Out Budget o既有：

1) For Star Production House  www.forstarproduction.com / http://www.facebook.com/forstarpage
2) Clover Studio  www.cloverhk.com / http://www.facebook.com/cloverhk
3) Miracle Production http://www.miracle28.com / https://www.facebook.com/home.php#!/MiracleProduction
4) Joseph Photo https://www.facebook.com/home.php#!/joseph.hong.kong.wedding.photo

好老實, 呢 D o野真係一分錢一分貨, 响 D 相反映到 Out Budget 果四間, 影相角度同手勢同埋 Video 真係有心機 D (呢 D o野當然係因人而異啦)。

同埋由於 D sales 哥哥態度問題, 令到大家有小小唔係咁愉快。最終 Eric 都係決定咗揀 Out Budget 果四間, 其中一間做我哋o既 "Big Day 婚禮攝錄"！

究竟邊間可以做到我哋o既 "Big Day 婚禮攝錄" 呢？

我的證婚律師 -- 二選一

呢個項目, 都算係睇得冇咁辛苦o既～

睇咗好多 Blog, 睇到以下呢兩位律師都有好好o既評價, 所以我心目中都係諗住搵以下呢兩位：

林志達律師 ( Anthony Lam ) 

林律師好 Nice, 初初係經 Facebook 聯絡, 我初初未定到日子, 只係俾咗個年份同月份佢, 問佢價錢, 我問o野又問得唔夠詳細清楚, 佢好主動咁叫我留電話俾佢, 佢再覆我講詳情。

Anthony 於 Facebook 回覆：[價錢不會因時間而異，只會就是否節日公衆假期及地點遠近而有所不同。

2011年6月1日後落實 2012 及 2013 婚禮者於普通日字港島或九龍半島區地鐵沿線收費為 4500+305 及 4800+305。

2011年12月1日後落實 2012 及 2013 婚禮者於普通日字港島或九龍半島區地鐵沿線收費為 4800+305 及 5200+305。 ]

同佢通過電話, 佢把聲好開朗, 好爽快, 仲同我分析埋 6:00pm 同 8:00pm 進場證婚o既分別, 感覺良好！其實我都 OK o嫁！！但係...... 價錢方面真係要同 Eric 傾傾至得！因為都....... 幾貴........

同 Eric 傾完, 都係決定睇埋岑律師先！

  岑漢和律師 ( Eric Shum)  


http://shumhonwo.blogspot.com/http://www.shumhonwo.com/htm/service.htm

睇咗岑律師個 Blog, Send 咗 Email 俾岑律師問佢有冇期, 同埋最 Update o既價錢～ 佢覆 Email 真係超快！！！
原來佢條 Link 果個價錢已經係最 Update (不過佢話 7 月前 Confirm Booking + Deposit 就仲係舊價, 7 月後佢就會加價啦！！所以想 Book 佢o既姐妹要快手啦～)

1. 婚姻登記處模式證婚
HK$3,000(律師費及已包含政府登記費) = HK$3,000(總金額)
2. 教堂式證婚
HK$3,000(律師費)+ HK$305(政府登記費) = HK$3,305(總金額)

跟住我打俾佢問問呢兩款證婚有咩分別, 同埋其他細節o野, 佢好細心話我知有咩分別～ 但係佢講o野速度真係快到有時會聽唔切 / 聽唔清楚佢講咩！！！(初初真係有 D 擔心, 佢講o野速度快成咁, 咁證婚果陣係咪都會係咁o既呢！？)

最後, 由於 Eric 想見一見岑律師, 問清楚 D 細節先至決定係咪落實請岑律師做我哋o既證婚律師。所以我好面矇, 好冒昧咁打俾佢, 誠意邀請佢出o黎見面, 我初初梗係以為佢會唔 So 我啦！點知佢好好人, 好順嘆咁話冇問題喎！！

出到o黎, 大家响傾談間感覺都良好, 佢講o野o既速度亦比响電話度正常好多！！！(我即刻放心晒 ) 亦好詳盡咁講解證婚細節, 亦有分析埋 6:00pm 同 8:00pm 進場證婚o既分別！


好好彩地, 因為我同 Eric 都想 "由我爸爸帶我進場 + 可以 拖  住  手  仔  情  深  款  款 咁望住對方宣誓", 我哋決定選用 "教堂式證婚"！而我哋亦想有一個莊嚴o既證婚儀式, 所以揀咗 6:00pm 時段進行證婚儀式！

我哋亦都即時 Confirm 咗請岑律師做我哋o既證婚律師。 


我諗有好多人都會覺得我哋傻咗, 真係諗都冇諗過, 連酒席都未搵到o既我哋, 竟然跳步決定咗 "我哋o既證婚律師" ！！！ 
Yeah！煩少樣啦！！

(其實我地都有問過載丙信律師o既資料o既～ 秘書打黎, 報價我知證婚價錢：
3300 + 305 (朋友介紹價)
3700 + 305 (冇朋友介紹價)
最利害係!!! 佢寫字樓係响灣仔, 如果去黃埔(博藝會)簽紙加 HKD100 車費而去側魚涌(八月芳)就要加 HKD300 車費!!!!!!!!!!!!!!!!!!!!!!!!!!! 我哋唯有講一聲 Bye Bye～)