17-21 Dec 2011 -- 北漏道拉！史無前例跟團之旅 (Day 1)

話說我已經 N 年冇跟團～ 我一直都鐘意自由行, 今次跟團, 係因為 Eric 覺得越南難溝通, 同埋治安唔太好, 所以決定跟團穩陣 D～

其實揀去越南之前, 我哋係想去韓國滑雪o嫁！！！但係由於我整親對膝頭, 驚滑雪會加重傷勢, 同埋日本出咗事, D 人湧晒去韓國, 攪到貴晒, 所以唯有下次再去啦～
越南！呢個國家其實我地想去咗好耐, 但係一直都冇去到～ 今次終於都去啦！！！

17 Dec 2011 (Day 1)：

胡志明市 → Diamond Plaza (自費 Lunch) → 古芝地道 → 地道中餐 → 自由人時間 (由於我地冇 Join 到導遊介紹o既水上木偶, 所以食完個晚飯, 返埋酒店, 就可以自由活動啦～ 對於鐘意自由行o既人o黎講, 有時間做自己o野係好事～ ) → 錦麗牛河 → 亡命擠塞電單車夜市 → 返酒店休息

左揀右揀, 揀咗星晨, 報團果陣話係 "晏機去, 晚機返"～ 但係好驚喜地, 最後結果係 "早機去, 晚機返"！！ 超開心！！感覺上好似賺咗大半日咁, kekeke

 


天都未光就出發啦 ! 超眼訓.....

 

由於大家都忙, 所以冇去過影聖誕燈飾同聖誕樹, 見到有一棵, 即刻走埋去應吓節先 !

上機 lu～ CX o既飛機餐幾好味～ 尤其係隻蛋同熱辣辣o既牛角包～～～
(題外話, 我好後悔冇食到個 Low Fat Yogurt, 一心諗住越南會有細細盒脫脂奶o既我, 原來係超級無敵o既痴心妄想！！！！唔好話脫脂, 我連低脂都搵唔到呀！！！！不過又未至於話完全冇o既～ 最後都俾我搵到一款～ 家庭裝一大盒飲成個禮拜果 D, 你話點飲啦！！唉....... 而家先至知道, 原來搵一包脫脂奶係一件咁難o既事～ 所以故事教訓我, 真係凡事都唔好太老定就係咁解囉～)

兩個鐘頭後, 我地到咗啦！！！熱到爆茄！！中間果張著西裝o既係領隊 Sunny, 拎住個牌果個係導遊 -- 偉強哥～

响呢個時候, Sunny 就同我哋成團人講, 原來有兩位團友 (掛住响機場"某某" Club House 度嘆世界) 冇上到機, 所以今次團友數目會減少兩個～

跟住坐車o既時候, 突然峰迴路轉！！再宣佈話果兩位團友會另外再買晏機o既機票過黎胡志明市, Join 返我地繼續行程咁話～ (佢哋呢個 Club House 嘆得真係貴......) 跟住我同 Eric 都係度諗, 唔知果兩位團友有冇响香港吵大鑊呢？？我哋成團人都好期待見到果兩位團友 XDD

   

由於我地由晏機變咗早機, 所以有一餐係唔包o既～ (至於餘下幾日o既早午晚三餐, 都會包晒～)
導遊車咗我地去 Diamond Plaza 食 Lunch～ (D o野好貴！！最豬就係冇格價, 又唔敢四圍行, 如果唔係, 就可以一早就發現原來我地同郵政大樓同紅教堂只不過係過條馬路咁近......... 激後悔......)

我哋叫咗一個豬肉, 一個蝦卷 (合共 VND85,000), 一杯芒果"扇多" (價值VND45,000, 都幾好味), 碗牛河搵老襯, 明明張相係有牛肉同牛丸家嘛, 點知出到o黎只係得牛丸！！！！(VND50,000), D o野食... OK la.... 唯有同自己講, Food Court o野.... 係咁o嫁啦...... (之後咪知呢餐係貴野囉！！！人地出面一杯"扇多"都係 VND15,000 咋嘛！！)
  

食飽之後就出咗去外圍行吓, 買咗個價值 VND10,000 唔好味o既椰青！！(泰國果 D 真係好飲好多....)

Lunch 後, 去咗我同 Eric 都好期待o既越南歷史戰場 -- 古芝地道！

導遊帶我哋去睇 "叉錯腳包保你冇命" + "陰人又成日陰到自己隊友"o既陷阱！(最右手邊果張相, 係地道o既其中一個出入口)

   

兵哥示範點樣車呔製涼鞋～ (佢哋話以前就係著呢 D 鞋打仗o嫁啦～)

Yo！準備入古芝地道體驗啦！！我哋全程係要 90 度烏低腰o黎行, 由於我哋係跟團, 所以唔係行咗好長咋, 真係只可以叫做小小o既體驗囉～ 好彩o既係, 我冇見到同事所講o既虫虫～～～～ 如果唔係, 我都應該會嗌到顛咗.........

(由於地道太黑, 所以冇影相, 只係影咗小小 Movie 咋！)

   (Yeah！挑戰成功)

去完古芝, 我哋就返返胡志明市食晚餐啦～
今晚係食地道中餐～ 叫小美唔知咩餐廳, 八餸一湯, 白飯任裝, 當中包括：炸春卷, 炸魚, 炒菜, 炒蛋, 炒蜆, 西瓜生果盤...etc. 連相都冇影.... 可想而之有幾吸引～

晚飯之後, 就車我哋返酒店啦！我哋呢兩晚係入住"五星級"o既 -- Windsor Plaza Hotel！！
一上到房, Eric 就搵插頭叉電～ 點知.... 堂堂"五星級"酒店竟然要自備轉插！！！ (其實我屋企有轉插o嫁, 但係 Eric 強調 "五星級" 酒店必定會具備萬用插頭, 叫我唔駛帶, 我咪唔帶囉～ 點知...... 爆大冷！！→ 又一凡事唔好太老定o既教訓～)

Eric 超無奈又激氣咁落大堂問經理有冇轉插借用～ 好彩有o者～ 如果唔係 Eric 應該會講足成晚！！
咁其實間房都唔係咁差～ 乾淨企理, 住得舒服囉～ 係插頭小插曲o者～ 不過好老實..... 似三四星多過似五星囉...... (Eric 話唔想影相留念, 所以冇影到酒店相同大家分享啦～)

由於我哋冇 Join 到導遊介紹o既"水上木偶", 所以一返酒店就可以自由活動啦～

我一早已經做定功課, 知道有間 "錦麗牛河" 好出名, 梗係要去試吓啦！！
(特別鳴謝幾位解答我問題o既 Blog 友, 同埋親愛o既同事 Veron 俾資料我！！)

有幾位團友聽到我哋食牛河, 又話想一齊去試吓, 我哋一於一行六人出發！！！
去食牛河, 我哋首先要亡命過馬路去酒店對面果兩條街, 再加入人車擠迫o既電單車隊行列～～

行行吓, 見到 ABC 餅店, 大家都買咗布丁食, 味道... OK 啦....

 

 
Yeah！！到咗 "錦麗牛河" 啦！我哋六個人叫咗三碗大o野 Share, 都幾飽..... 湯底同粉的確係不錯o既, 河粉好滑, 好過 Lunch 多多聲呀！！！至於牛肉...... 見仁見智啦, 各人鐘意o既口味不同～

Eric 叫咗柑桔水飲, 我唔信邪再叫椰青, 結果......... 都係信邪好～ (同我合照果位就係 "錦麗" o既老闆啦～ 都幾 Nice o嫁～)

 

 

最後團友門買"扇多"飲～ 我同 Eric 因為太飽所以冇買, 點知就因為係咁, 竟然俾我哋見到個令我哋驚心動魄o既製作過程！！！

原來 "扇多" o既主要材料包括：水果 (用料十足, 冇偷工減料)、鮮奶、練奶......(重點o黎啦！！) 兩～大～殼～白～砂～糖！！！講緊o既殼唔係湯匙, 而係細過湯殼小小果 D 糖水殼！！！(大家有機會留意下 D 糖水鋪 / 酒店用o黎"筆"湯、粥用果 D 殼仔)

就係因為呢個驚人o既大發現, 令到我哋餘下o既咁多日都唔敢再飲, 好飲但勁高糖份o既 "扇多"！！(但唔知點解, Lunch 飲過又唔覺佢似咁甜個喎～)

冇飲齋影o既我哋, 影完張相就返酒店休息 lu～ 至於早上失踨果兩位團友, 係仲未見人o既～

～ 待續 Day 2 ～

17-21 Dec 2011 -- 北漏道拉！史無前例跟團之旅跟團行程表！！

今次係我同 Eric 史無前例o既跟團之旅, 左揀右揀之下, 我哋揀咗星晨～

報團果陣係未成團o既, 團費 HKD3,499 (另外要加稅 753, 簽證 480, 保險 179), 最後我地決定自己簽證 @ 330～
Total 起行要 HKD4,761.00 一位！

初初報團果陣話我哋知係晏機去 (16:30 起飛) 晚機返 (19:05 起飛), 超驚喜！！！Final confirm 果陣變咗係早機去 (08:50 起飛) 晚機返 (19:05)！！！感覺上好似賺咗大半日咁 
越南 胡志明市、古芝地道 (聖母大教堂、美拖市、湄公河三角洲、戰爭博物館)、頭頓 (耶穌山、鯨魚廟) 5 天豪華團 (AVSGN-5E)

以下行程係真實起行o既行程o黎排序～ (同佢本身果個次序有小小分別)

17 Dec 2011 (Day 1)：

胡志明市 → Diamond Plaza (自費 Lunch) → 古芝地道 → 地道中餐 → 自由人時間 (由於我地冇 Join 到導遊介紹o既水上木偶, 所以食完個晚飯, 返埋酒店, 就可以自由活動啦～ 對於鐘意自由行o既人o黎講, 有時間做自己o野係好事～ ) → 錦麗牛河 → 亡命擠塞電單車夜市 → 返酒店休息



18 Dec 2011 (Day 2)：

胡志明市 → 天后宮 → 美拖市 → 湄公河三角洲 (乘觀光遊覽船) → 椰子島 "天道教教壇" → 泰山島熱帶果園 (任食水果, 水果特產: 如芒果、紅毛丹、人參果等) → 獨木舟之旅 → 食油泡象耳魚餐 → 堤岸唐人街 (途經) → 前總統府 (外圍拍照) →  聖母大教堂 → 郵政大樓 → 市政廳廣場 (外圍拍照) → 地道中餐 → 自由人時間 → 行酒店隔離o既安東市場 → 坐酒店車去鬼佬街夜市 ( D o野好貴！！海鮮又唔抵食！好後悔呀！早知堅持返酒店附近果幾間食好過！呢 D 咪叫做 "做唔足功課惹的禍" 囉～) → 返酒店休息



19 Dec 2011 (Day 3)：
胡志明市 → 戰爭博物館 → 漆器廠 → 自助午餐 → 隆城水果市場 (極度坤水！！D o野貴過出面兩三倍！) → 頭頓 → 頭頓海灘 → 越式風味餐 → 自由人時間 (我哋冇 Join 導遊o既自費大頭蝦餐, 打算自己出去食, 點知........唉..... 行得太遠, 又攰, 各人冇力回頭再食) → 食雪糕 → 露天 Bar 飲"滴滴甘" (好好味！) → 返酒店休息



20 Dec 2011 (Day 4)：
頭頓 → 鯨魚古廟 (相信只係跟團先至會去) → 耶穌山 → 返酒店梳洗 → 大頭蝦海鮮餐 → 隆城水果市場 (回程停留俾各人抖抖 + 去洗手間) → 胡志明市 → 越南歷史博物館 → 順化皇帝餐 → 自由人時間 → 期待已久大手掃入 NHU LAN 札肉時間  → 搵餐死o既 Fanny 雪糕 → 返酒店休息



21 Dec 2011 (Day 5)：
胡志明市 → 未夠鐘集合, 早餐後同團友去 Big C 掃貨 → 地道中菜 → 自由人時間 → 重點行程！！！搵 Trung Nguyen 買 Legendee Coffee  → 食 Bach Dang 雪糕 → 搵想食果間法國菜餐廳 (點知竟然成座商場拆咗！！！有冇黑成咁呀.......) → 歌劇院 (門外拍照) → High Tea → 返香港 

睇褂啦!!

是日睇褂日~

今日同媽咪 & Eric 去睇褂, 做咗小小功課~ 分別去咗錦發、永隆、冠南華~
本來都有諗過去埋榮華、鴻運, 但係.... 位於金都, 驚驚地係黑店, 所以冇去到~

由於冠南華唔俾人影相 (除非俾錢租衫), 所以冇相睇啦~
無可口非, 佢 D 褂係新淨 D 靚 D o既~ 有件好 Fit 身, 勁靚!!! 但係........激貴!!!!!!!!!! 問咗件中五褔, 都要 HKD3,800, 租頭褂的話要 HKD4,800, bye bye~~~
其實都係去八吓佢有幾好o既o者, hahahaha

錦發 
地址：九龍旺角上海街523號地舖

1) 中五褔 - 龍鳳繡波浪腳

媽咪同 Eric 都異口同聲讚好~ 著上身都幾鬆, 但係嫦姐話佢地會幫我做 fitting, 改到 fit 晒, 叫我地放心喎~ 又話手長可以改, 衫身可以改....總之好似乜都可以改咁啦~


嫦姐話呢件我會係第三手著, 所以要租 HKD980 大家覺得係平定貴??





2) 中五褔 - 鴛鴦繡波浪腳感覺上好似冇第一件咁好睇~ 同埋媽咪覺得佢冇乜粉紅, 太銀喎~





3) 小五褔唔知點解, 我硬係覺得麻麻地~ 媽咪佢地都覺得普普通通啦~

4) 水晶褂 - 媽咪好想我試, 但係試完之後... 我真係好麻麻囉...乜靚咩?? 嫦姐話呢件係頭褂, 腳 D 珠珠都未釘好o嫁~

永隆繡莊
地址: 九龍油麻地上海街409號地鋪(近油麻地地鐵站A1出口)電話: 2780 3007營業時間: (星期一至日 10:30-8:30, 假期照常營業)

試完錦發, 我地走咗去永隆睇吓, 唔知係 D 好野出晒街定係唔知咩原因..... 我地三個都覺得, 佢俾我試果幾件褂都真係.... 幾咁殘吓.... 同埋 D 龍鳳繡工睇落冇錦發咁活潑生動~


5) 中五褔 - 龍鳳繡平腳, 終於試咗個平腳, 原來我真係著水波腳靚 D~~~

6) 中五褔 - 龍鳳繡水波腳, 呢套離晒譜, 都仲要租八百幾, 又殘, 你地睇吓個"水波腳"!!!! 乜似水波咩!?!?!?

7) 水晶褂 - 睇落呢條 D 繡工係靚過錦發果條, 但係...... 我都係麻麻地水晶褂~

8) 大五褔 - 一場黎到, 梗係要試吓大五褔啦~ 但係.... 似乎好似唔多啱我咁喎~

綜合咗 Eric 同媽咪o既意見, 佢地都覺得錦發會好 D (唔計冠南華, 佢實在太貴啦!!!), 我仲諗緊去唔去睇埋榮華 & 鴻運好呢??? 大家又覺得我著邊件靚 D 呢??

戒指刻好名, 返咗o黎啦!!!

整完返o黎～～ 靚晒～～ 一於 Post 出o黎同大家分享吓先～
由於我影相唔叻, 加上女裝係內卜設計, D 字又細粒！！！！！！！所以影咗好多張至可以收貨...... hahaha

由於 Eric 獨愛光身 / 珠珠邊～ 而我就鐘意一排石～
所以我哋揀唔啱對戒, 唯有襯返兩隻都係珠邊o既戒指做一對～
靚靚戒指～ 

女裝果隻好閃令令～～ 我鐘意～～ kekekeke 




你o地睇吓！！男裝 D 字幾咁大粒同埋清楚！！

至於女裝..... 內卜設計, 我鐘意個手感～ 但係影相狂反光囉！！！同埋 D 字細粒過男裝百倍！！！影死我......... 好難得至可以影得咁～～ 清楚！大家咪以為 D 字好大粒, 其實就咁肉眼睇實物係激細粒o嫁！

無意之中遇到你

琴日等食飯, 同男友去咗百利行街, 諗住睇吓有冇 D 細細隻o既公仔賣～
點知咁啱撞正有間鞋鋪唔做, 啱啱琴日係 Last Day！！結果, 我買唔到公仔, 反而買咗四對鞋！
夾埋都唔駛三百蚊, 真係超抵呀！！

本身都冇諗過會買褂鞋！但係橫掂又睇中咗, 又抵喎！我哋就決定買咗佢啦！咁早買, 真係有 D 顛顛哋～( 其實我哋睇中另一對閃令令o既褂鞋先o嫁, 但係冇我碼..... >_<  但係呢對有個如意結, 又係一吋踭, 都唔錯吖, kekeke)

買咗兩對普通o野要o黎返工, 一對 3 吋高米白色, 後面側邊位有小小石, 可以出席宴會o既～
本來仲有對 3 吋高, 粉紅色前面有 D 石, 好啱腳o嫁, 但係因為 Eric 話驚難襯衫, 所以放棄咗冇買, 其實我都想買o嫁～ 可惜！！
跟住行返落一層, 見到有間賣同款o既褂鞋, 中埋去八吓幾錢啦！要 HKD118.00 喎！！我真係覺得我對鞋好抵呀！但係好老實, 樓下賣鞋果間鋪 D 晚裝鞋真係幾靚個喎！我見到有個女仔試著對超高踭有石o既鞋, 真係幾靚～
即刻去相俾大家睇吓先！

 



(題外話, 攪咩而家 Yahoo 咁黑人憎, 唔俾人自己調較張相o既大細o既？之前都得格！！好彩我較早前 add 晒旅行 D 相o者！如果唔係咪死得人！！家陣想 D 相擺得歸一 D 都唔得！)