台北自由人開心之旅 2007 -- Day 4

今日係我哋台北自由人最後一日，天氣好麻麻，一早就已經雨綿綿！

話說 Day 3 晚我哋買唔到 李鵠鳳梨酥 ，今朝要九點半前要到基隆買鳳梨酥 ，真係痴鬼咗線！！當時都覺得自己發緊神經！咁早起身就係為咗 D 餅！但由於我哋真係好想買o黎食，所以我哋今日一早就起身撘車去台北車站隔離轉公車去基隆！

 

車程都好快，九個字就到啦～～ 行緊過去已經九點半，我勁驚！！我真係驚九點半後冇晒餅賣！若果買唔到，我真係會噴血！終於行到去啦！！即刻排隊落 Order 啦～

我哋買咗八大盒三十個裝o既鳳梨酥，同一盒綠豆碰！ 但係排我哋後面o既台灣女人就唔好彩啦！因為最後八盒俾我哋買咗！hahahahha

我哋買到手梗係開心啦！但問題立刻出現！就係好好好好(乘 N 次方)鬼重 …… 拎到我哋死死吓 …… 買完餅之後，我哋就返台北啦！

我哋返返酒店放低 D 餅，整理完行李就 check out 啦！寄存完行李，我哋去西門町食o野同埋最後衝刺買手信 (買綠豆糕俾亞 Wing、買三 Q 總統餅、我o既重點手信黑橋牌腸仔同埋亞宗麵線) 啦！我哋去咗食 謝謝魷魚”更”！味道 OK 啦！跟住行行吓俾我見到 永和豆漿，即刻去買咗杯試吓！下次我絕對絕對絕對 (乘 N 次方) 唔會再買！仲衰過飲水！ 

之後就去買都係我心愛o既台灣特產黑橋牌腸仔啦！(真係好好味o嫁～) 

買齊晒 D o野，我哋就返酒店做最後整理， 我特登 拎咗個保溫瓶去裝亞宗麵線返香港俾屋企人食！結果相當成功!!  返到o黎仲識得標煙！

攪掂晒 D o野，我哋見 D 雨越落越大，又怕塞車，所以就提早撘車去機場啦！走o既時候好大雨！一時太瘋狂買咗太多o野，好狼狽，都冇手拎遮！

去到台北車站諗住撘飛狗，但係無啦啦有個的士哥哥埋o黎兜答我哋！新發現，原來台灣都有"泥猛的"，原本 nt 200 一個人，減到 nt 150，車上仲有兩個香港女仔！ 暢談甚歡！原來仲要係同一班機添！

 

去到機場 check in 過磅，個行李箱已經 38kg，個行山背囊都 16kg！ 我哋眼都突埋！竟然 Over loading！！我哋要將 D 鳳梨酥拎晒出o黎咁濟都仲差 6 kg，地勤小姐見我哋咁辛苦搬離搬去，結果都隻眼開隻眼閉咁，俾我哋過！(每人有 20kg o既行李重量，我哋竟然超過咗！！真恐怖！最重o既就係鳳梨酥！)

我哋去咗飲焦糖咖啡，撞返晒之前同一班機o既自由人朋友仔同埋兩個的士女仔，傾傾吓，我哋至知原來佢哋本身都係同我哋一架旅遊巴o既，但係架車竟然冇等齊人就開車，攪到佢哋要自己坐車去酒店！真係過份！！！

 

總括來講，今次行程都幾開心，超出預算o既係時間，比想像中逗留長咗！有 D 景點都要放棄，饒河夜市啦，北投地熱谷及博物館啦，其他都去齊！

 

 ～ 四日行程！完成晒啦！^o^ 多謝大家收睇！～

台北自由人開心之旅 2007 -- Day 3

好啦～ 到到第三日啦！我相信呢篇係响呢四日遊記裡面最長o既一日，各位要有心理準備！希望你哋唔會睇到一半就唔睇啦！

好！重點之旅 現在開始！

 
琴晚睇好晒時間表，知道 10:50 有班火車去瑞芳。我哋 9:00 起身，支支助助食埋酒店早餐 (早餐位超細囉！得三張台咁大把！！落到去已經坐滿人！我哋唯有企响度飲咖啡同食早餐啦！真係第一次响酒店要企响度食早餐！！！) 食物就真係…… 唔多款揀！我哋係咁二食咗每人兩塊牛油烘麵包同荼葉蛋，唯一讚o既，就係咖啡幾好味～～ 食飽飽之後！我哋就撘捷運去台北車站啦！

我哋一離開咗酒店行咗幾步，奇怪啦！點解條街咁多人，咁熱鬧o既？原來！！！今日係台灣偉大o既天后娘娘 ── 媽袓文化節。 (竟然咁好彩俾我哋撞到！！原來買唔到十點前o既火車飛係有玄機o既～～～～～)

咁難得撞到，我哋梗係留低睇吓啦！睇睇吓o既途中，突然有位工作人員拍我哋，叫我哋小心放炮！原來我哋企正响支大大支"爆奬"隔離！！佢呢頭叫完，負責放炮果位人兄已經放緊啦！我哋閃都閃唔切！由果一刻我哋將會好好運，因為衰o野走晒～～～ haha

跟住响一位好好人o既工作人員同我哋講解下，我哋至知道果七位英明神武o既神祇，就係我哋每個人死咗之後，得到o既 最後成績表 就係經佢哋手審判o既 ── 七判官！我哋啦啦淋影咗好多相，最可惜係未見到天后娘娘出巡就要走啦！因為當時已經係 10:33，我哋要趕 10:50 火車！

我哋 去到火車站已經10:45，排隊買飛果陣仲 遇到一位似係型男o既型男！佢問票務員一大堆有關火車o既問題，但係遲遲都唔見佢買飛！其他櫃位又多人！想轉排第二度都唔得！！激鬼死我哋！

最後 10:48 買到啦！！！票務員話：[ 快！快！快！ 四號月台！！！ ] 我哋兩個好似有鬼追咁沒命狂奔咁奔到月台！(由售票處到月台o既路程都唔算近～～) 火車已經到咗，我哋一坐好位就開車了！  Yeah ！十份！菁桐！我哋o黎啦～～！

頭先 好似有鬼追咁沒命狂奔 都唔算驚險！最驚險o既係，我哋 "到逹瑞芳果陣已經係 11:30" (我哋要坐 11:35 响隔離月台o既平溪線火車去菁桐，如果上唔到呢班火車，就要 等到1:00 先至有火車 ) 一落火車，我哋立即跑去買平溪線一日遊  (好多人排隊 …… 極擔心)，11:33 買到了!!!!  我哋又沒命狂奔又上又落咁奔去隔離月台，兩人一前一後咁飛上火車，都未企定，火車門就响我哋後面"絲~~~~~噗"一聲咁關上！動作慢小小都會漏咁個呀！

我哋即刻對望一眼！完全覺得超好彩囉！( 勁呀！！！！ 真係唔可以唔佩服我哋o既爆炸力呀！HAHAHAHAHAHA  )

 

响火車往菁桐 o既期間！ 我哋認識咗同我哋一樣都係去十份O既一家五口台灣朋友同埋一位住 "嶺腳" o既婆婆，佢十分之好人，沿途不斷介紹景點，仲邀請我哋去佢屋企坐坐！！( 我哋當然冇去打攪佢啦！不過我哋有影相留念！)

 

12:05 終於到 菁桐 啦！好滾動～～～～ ^o^ 

我哋博晒命咁响條路軌度影相，果度真係幾靚！咁轉接o黎，都係值得o既！

周遭環境不其然會令人覺得開心！不其然會 E 起棚牙 hahaha ！咁大個女，都未試過可以 咁自由自在，唔駛驚車死  o既情況下(平均個幾兩個鐘一班火車)，响條路軌度做乜都得！(雖則香港果個火車博物館都可以，但係梗係唔夠呢個真實同靚啦！感覺差好遠～～～)

 

跟住 12:35 我哋就去咗菁桐鉄道故事館 買重點手信！木明信片 啦！果度都好多選擇，俾晒錢貼好晒郵票之後，我哋就瘋狂快速咁寫字同蓋印仔！因為要趕 1:15 火車去十份！但係唔知係我哋寫得太慢定係太多張o既關係～ 我哋 Miss 咗班火車！要等到 3:11 至有車 T.T  ……

 

終於去到十份 啦！本來我想放天燈，但係天色唔好，雨綿綿咁，所以冇放到。

我哋用咗大約七個字至行到十份瀑布 ！我哋拎咗响瑞芳買o既平溪一日遊飛出o黎，因為入場可以平 D o嫁！最可惜係天色麻麻地，去到瀑布天陰陰咁…… 瀑布景色 OK 啦～～ 我哋逗留咗一陣就走咗啦～～ (一來冇咩睇，二來已經 4:30 ，又天陰陰，我哋驚天黑齊都未行到大華站！)

 

因為天色問題，我哋都有諗過行返去十份站！因為由十份瀑布行去大華站係行火車軌o既，途中一定要通過一個漆黑一片o既隧道(約三分鐘)！同埋一定要睇清楚火車通過o既時間！否則入咗隧道真係有火車o黎，真係好危險同會嚇餐死，閃唔閃得切都成問題！但係暫時冇聽到有發生過任何命案！

 

諗咗一陣，又 confirm 咗冇火車經過，離遠又見到隧道都有光，所以都係 決定行去大華站 ！其實一路行我哋都好擔心會落大雨，又驚天黑！我哋快快步咁去到隧道口，都仲見到有光都冇咁驚！我哋電筒出o黎照明，但用途唔大，只係做到小心唔好仆親o既效果！當我哋行到差唔多中間部分o既時候，原來真係會伸手不見五指o嫁！！！你只會見到自己果支電筒仔照住地下o既小小光、聽到自己腳步聲、呼吸聲同埋滴水聲！講真，路程雖短，但係我真係幾驚！步伐不其然咁加快，出咗隧道先至冇咁驚！但係俾我開口中，D 雨真係越落越大！由十份去大華站好快，只係四個字o者～ 不過行火車軌石頭行到好鬼攰 ……

 

我哋撘 6:15 火車返瑞芳，因為我哋要去 基隆廟口 同埋去李鵠餅店買鳳梨酥 。

响途中，我哋見到有人賣 礦工便當，我哋都貪過癮買咗個o黎食，都幾好味，各位有機會可以試吓！

响我哋唔知轉咩車去基隆，走去問站長o既時候，好好彩地俾我哋遇到一位帶住四個小朋友住响基隆o既太太，佢好 nice 咁話帶我哋一齊去基隆。

去到瑞芳唔落車，直接去八堵，再坐火車去基隆，一路都好順利，而且等火車去基隆都只不過等咗十拎分鐘！hehehhehe

 

 

"不過最失望o既就係 …….. 我哋八點半到達基隆，但係買唔到李鵠o既鳳梨酥！！！！"

 

李鵠o既員工話要 每朝o既九點前到達及排隊，先至會有機會買到～～ 九點半打後就冇啦！！發顛囉～～～

我哋最後只係買咗蛋黃酥，口感都唔錯～～  最後我哋決定聽日一定要响九點半前o黎買 鳳梨酥！真係痴鬼咗線！x_x

最後我哋去咗基隆廟口食晚飯，跟住就去基隆火車站隔離撘公車返返台北火車站啦！

 

究竟我哋聽日買唔買到鳳梨酥呢？鳳梨酥又好唔好味呢？請各位繼續留意 ～ Day 4 ～

台北自由人開心之旅 2007 -- Day 2

今日原本打算 10:00 就走去 鼎泰豐食小籠包 + 冰館芒果冰，跟住就去地熱谷 + 温泉博物館，點知！！我哋 訓過龍！！！起身都已經 11:00！支支助助攪掂行裝離開酒店都成 11:30！！由於我哋响 Day 3 會去我哋重點行程～十份、菁桐 o既關係，我哋預早去咗台北火車站買 9:00 o既火車飛去瑞芳！我哋好鬼老定，諗住咁早買定聽日o既火車飛，實冇死錯人啦！！

點知！！！售票姐姐話聽日 10:00 前都冇晒位啦～～～  勁心酸～～好想喊 ～ T～T 即刻 Down 晒！！不過佢話聽日可以再去睇o下有沒有其他火車位，咁我哋唯有聽日再去查o下區間車有冇位啦！

 

我哋懷住好鬼擔心…… o既心情去食 鼎泰豐食小籠包 ，咁當然，食果陣都叫自己忘卻火車飛問題，專心享用美味的小籠包啦～～我哋叫咗一籠蟹粉小籠包、一籠普通小籠包同一碗擔擔麵～～ 我覺得 蟹粉就香 D ，普通就清 D  (我比較鐘意呢個味多 D)，至於擔擔麵…… 嘛嘛哋！我唔會再嗌囉～ 最終因為趕唔切關係，結果我哋被迫放棄咗 冰館、地熱谷 + 温泉博物館 呢三個景點 …… T~T

 

兩點幾三點至扺達 淡水老街 ，我哋一路行一路食，一路搵 阿媽的酸梅湯，終於俾我搵到！都幾好飲！冇香港果 D 咁甜，同埋個酸梅味真 D！

我哋一路向 紅毛城進發 終於行到去 紅毛城 啦～～～ 特別，就唔係話好特別，不過都幾靚～～ ^o^  睇日落都唔錯o嫁！影相影到忘晒形！最後終於都o黎到 漁人碼頭 啦！(超趕睇日落！！！) 我哋以極快速咁影咗大量日落相！但效果麻麻地～ 天灰灰又多煙霞，影出o黎唔多靚～～ 唉～～～ ( 我哋响 2006 已經做咗次台北自由人，响漁人碼頭影日落，靚到爆呀！！今年有 D 失望！ ) 

 

 

因為約咗 台灣朋友仔 9:00 响士林夜市等 我哋決定留到七點半就返老街買 鐵蛋同埋其他手信 ！點知突然間朋友仔打o黎，話佢已經到咗士林夜市 !? 我好愕然！乜唔係九點咩！？而家係六點咋喎！！！原來～～ 佢聽錯咗～ 以為係六點！！因為我哋未買手信，佢過o黎 Join 我哋，我哋啦啦淋返返去淡水捷運站等佢啦～～～ 齊人啦！我哋沿途又食過！鹽酥菇好好味！各位值得一試！！！跟住去咗食 阿給 (超多人～)，我哋點咗一人一客阿給，一客肉圓同埋一客魚丸湯！(嗯 …… 總括而言，我覺得三樣食品都冇乜特別～～ 唔係想像中咁好味！) 食飽飽就去買o野啦！途中有檔賣 龍鬚糖 o既檔仔，竟然有得試食！！！ 老闆極力推介 梅子味  又真係幾好味～～我哋一人買咗一盒～ 買齊手信都差唔多八點幾九點，我哋就轉戰 士林夜市 啦！

 
果度只能夠用三個字o黎形容，就係～～ "激多人～" D 人多到塞實晒，完全行唔到！好似十幾年前响羅湖過關咁！我哋見唔多對路，一於掉頭逆流咁走返出人群，我哋一個屈尾十就行咗去小食檔果邊啦～～  (又食！可想而知，响短短幾日，我肥咗幾多！唉～)

跟住我哋去咗 必去o既辛發亭食雪片！我哋叫咗一客蜂蜜蘆薈雪片同一客芒果雪片。

 

食完之後，我哋响 竟然仲食得落 o既情況下，我哋做咗上年心動但冇做，而今年心動但有做o既決定！就係好鬼大塊兩個人食唔晒但係好好味o既 豪大大雞排 啦～～  (至恐怖係兩個人竟然食得晒～  噢賣桔～ 台灣朋友仔太飽，無力幫手～～)

 

實在太滿足啦～～！！！後尾我哋去咗買手信之一，好好味o既 ─── 白苦瓜汁！

我買咗一杯白苦瓜汁飲，降吓火～ 我仲買多咗兩杯叫老闆娘幫我入落個樽度，等我拎返香港俾屋企人試吓添！！

 

跟住同台灣朋友仔分手，我哋就飽到痴晒線咁撘捷運返酒店做豬啦～～～

台北自由人開心之旅 2007 -- Day 1

好開心~~~ 去完個旅行啦~ 影咗好多靚相，hahahaha！

九月去完，成十一月至開始寫遊記，唔知會唔會遲咗 D 呢！？ hehe　

 

我哋撘 10:25am 中華機飛去台北，我哋好準時 8:30 前扺達機場 Check In，跟住我哋就去免稅店度逛咗個圈，話咁快，經過個半鐘o既機程就到咗台灣啦！！^o^  

落咗機，我哋攪完一大輪之後，終於上到架旅行社o既所謂旅遊車啦～ 但係個領隊好唔掂囉！佢根本未數齊人就開車 (詳情見 Day 4)， D 自由人問佢o野又一問三不知！

跟住車咗我哋去維格買鳳梨酥，但唔係太多自由人朋友仔買，佢已經唔多 Likey，去到總站一樂園，我哋有成五個自由人都係住金帥商旅，我哋成班人問佢可唔可以車近小小酒店俾我地落，但係佢o既態度完全係"我已經車到你哋o黎呢度個啦喎～ 我已經完成我o既職責個啦喎～" 態度真係好到呢～～ 咁咪算囉～ 幾條友一齊行去酒店啦～

 

Check In 完之後，已經三點幾四點！我哋啦啦淋去搵公車去迪化街買我哋 最愛o既豬肉紙 啦！！買完之後，我哋就返返去西門町。

返到西門町就見到成都楊桃冰，之前响 D 旅遊討論區見到有D 網友 Post 話酸酸哋幾好飲，咁我哋就買咗杯楊桃汁同鳳梨冰試吓，仲驚死唔夠飲咁買咗 700cc！！！結果 "賴   晒  o野"  T_T  ！！！嘩～楊桃汁酸到爆呀！！(我係會食酸o野o既人)

 

如果睇緊遊記o既朋友仔，係唔多食酸o野的話，我勸你唔好試，如果真係想試，買細細杯 / 楊桃冰好啦！！(除非你掃街掃到非常飽，咁都不失為一杯"極速"幫助消化o既飲品！) 至於鳳梨冰問題唔太大，但個人認為甜咗 D！

 

食埋亞宗麵線之後，我哋就去咗紅樓行咗個圈，裡面完全冇o野睇！

跟住下一站就係我期待已久o既公館夜市 (食藍家刈包) + 台電大樓站o既師大夜市啦～～

 第一站去公館夜市，奇怪啦～ 點解冇檔仔，又冇乜夜市 Feel o既呢！？(好失望～～ 我重點係 食藍家刈包 搵唔到夜市，即係食唔到佢～)  但係果度真係好多鋪頭，可惜在我去到時間唔多夠行晒～～～ 行行吓，屈咗入去橫行仔搵 D 食物檔仔 ，行行吓竟然俾我哋發現到 聽聞好好味o既鴉片粉圓 ！！！事實上，都幾好味～～～ 食完佢之後，我哋開始見到曙光！行多兩步，嘩 ～～～ 前途簡直一片光明呀！！！！原來佢 D 食物檔唔係响大街，而係全部都响橫街及街中間，裡面好熱鬧，有好多學生擺檔。

 

我哋沿路係咁食，食到咁上下，終於都俾我見到佢啦～～～～～ 勁滾動呀！！！公館夜市 o既藍家刈包，真係好鬼死好味！佢仲有得俾你揀要咩豬肉，半肥瘦、肥、瘦，裡面有莞茜、花生碎、仲有 D 唔知咩配料！個包熱辣辣又軟綿綿，我哋食完一個半肥瘦，跟住忍唔住口再試多個肥！肥就香 D，但係膩 D！但就係因為呢兩個包 …… 我哋飽咗！！！ 不過算啦，食到佢，我相當滿足！

 

跟住我哋就轉戰 師大夜市，呢個夜市都多o野食同行o既！但個人觀感，我覺得公館夜市多o野行 D！師大夜市o既 許記生煎包 好好味～～～   

呢兩個夜市都幾得意，大街就得 D 買衫鋪頭，至於小食就一檔都唔見！原來佢 D 食物檔唔係响大街，而係全部都响橫街及街中間，裡面好熱鬧，有好多學生擺檔.

不過我有個小建議，如果有朋友仔想去呢兩個夜市，唔好擺埋同一日行，唔夠時間行o嫁！！

DAY 1 的行程完成得唔錯，想做，想食o既都做到！食到！好開心！ ^o^

 

待續～ DAY 2～