Pre-Wedding 揀揀揀

忽然至醒起, 我原來一直都唔記得將 Pre-Wedding D 資料寫返出o黎做紀錄, 其實响 2011 年 2 月份果個婚紗展已經 Book 咗, 等我拿拿聲寫返出o黎先。

其實响 Eric 求婚 (10月) 之前, 我哋都有入過幾婚紗展, 諗住預算吓結婚o既開支, 樣樣都睇, 攞吓料, 好預數～
一開始就梗係係咁睇 Pre-Wedding 同酒席啦～

未打算結婚之前, 都有諗過去台灣影相 (唔知點解我哋冇諗過去日本 / 其他地方影 Pre-wedding) 但係睇完資料, 再計吓條數～ 嘩～～ 都真係幾多跟尾錢要計, 為咗可以儲多D 錢買樓, 我唯有忍痛放棄！

咁即係選擇仲有 -- 香港、澳門同大陸

行婚紗展睇咗好多間 Pre-Wedding 公司, 唔知點解, 我同 Eric 都冇將 Monalisa, 新天地, France Bridal 呢 D 例牌香港公司列為考慮之列。

1) I Do -- 本來都俾佢吸引咗, 仲睇埋 Pacakge, 初初都傾得好地地, 都幾滿意添, 但係傾到 D 細節位, 我哋唔問佢, 佢都唔話我哋知星期六日影要加 HKD500.00, 唔包白色西裝, 要著的話就要加 HKD500.00, 仲要另收 HKD500.00 清潔費喎。傾咗一陣, 我哋反問佢, 你白色西裝已經要加錢, 點解仲要俾多 HKD500.00 清潔費你？Sales 話: [ 因為白色易"烏租", 成日要洗, 好快殘, 公司要換過新o既。] Eric 好客氣咁即刻反問佢: [乜你哋黑色西裝唔駛洗o既咩？？咁你哋 D 衫要換過新o既, 都係公司問題, 冇理由咁樣就要加咁多錢o者～] Sales 一下子唔知點回應, 態度開始麻麻地: [ 公司規矩, 無論點都好, 總之加錢著白色就要俾 HKD500.00 清潔費啦！] 嘩～ 咁老奉, 你慢慢搵客啦, Bye Bye～

2) 3V -- 有朋友影過, 同埋聽 D 人講都話幾好, 所以去八吓, 睇過 D 相版感覺 OK, 但係冇嘩一聲o既感覺, 要再考慮考慮, 唯一好處係平, 同埋包勁多相！！！

3) 深圳現代經典 -- 以為係香港同澳門o既分公司, 點知唔係！！想法同好處同 3V一樣～

4) 香港現代經典 -- 行過俾佢o既 "香港 + 澳門婚紗攝影, 另送萊斯酒店一晚" 吸引咗, 傾咗好耐, 但係都冇開到單, 因為 Eric 奇怪有冇咁大隻"夾拿"送酒店, 同埋只係初步, 我哋想再睇吓先。

開始睇酒席啦！！

由於我哋兩家人都想客人食得開心 D, 所以主打都係睇酒樓～～ 呢段時間我不斷上網搵資料, 諗住襯呢幾個禮拜多假期, 就同 Eric 係咁四圍去睇場地啦～ 主要都係睇九龍同港島區～ 真係行到腳都跛埋！

我初初由興致勃勃, 都睇到冇咩心機, 原來搵一個啱心水o既場地係咁難o嫁！！！場地地區啱, 價錢唔啱！地區價錢啱, 但係場地唔啱！ 加上 Eric 對皇X皇同百X門 集團 (冇錯, 真係集團, 唔係個別酒樓) 都唔鐘意, 所以我哋o既選擇少咗好多～～

我哋係聯婚, Total 打算擺 20 圍～

我哋o既要求係：

1) 樓底要高
2) 場地最好冇柱, 四四方方唔好三尖八角, 夠光猛
3) 食物質素
4) 地點方便, 撘車方便
5) 價錢合理, Payment Terms 好
6) 員工服務態度好
7) 集團口碑好
8) 新娘房夠唔夠大
9) March In 方式

10) 其他包括o既 DISCOUNT - 酒水呀，車位呀，幾點可以交埸....etc

原本以為都唔係好高o既要求, 點解都咁難搵o既呢！？
( 但係睇睇吓... 又好似真係唔算係 "唔係好高要求" 囉！！ )

Propose and Engagement on 1 Oct 2010!!!!! ～後續～

求完婚之後, 個個突然鳥獸散～ 真係突然 Say Bye Bye 渣一聲走晒果隻喎！！其實果一刻個感覺真係唔係咁好o嫁, 奇怪朋友們點解個個都走得咁急趕o既？？感覺好似突然間就完咗個求婚咁, 感覺真係相當之麻麻～ 仲以為會一齊食飯慶祝添？

跟住我同 Eric去咗食 Tea, 佢話今晚有個朋友 Book 咗酒店房睇煙花, 我哋今晚過去睇完再一齊食飯好唔好呀？其實我唔係咁想o既, 因為今晚話晒都係週年紀念 + 求婚日吖嘛, 仲諗住有餐飯浪漫吓添～ 不過最終我都話好～

食完 Tea 之後, 我哋就向太古o既 East Hotel 進發啦～ 入到 "車立" "禁"制冇反應喎, 跟住我就出去搵員工幫手啦, 點知呢, 我一入返"車立" Eric 就話"禁"到制囉喎。(到呢一刻我竟然 都  冇  發  現  有  問  題, 真係超傻, 超天真   ！！
因為..... 撘"車立"上酒店房係要o都房咭的！！可能就係我呢種咁易俾人呃同信人o既反應, 滿足到 Eric o既保護慾, 同埋唔駛你猜我度咁, 咁辛苦去相處  )

上到樓, 佢打俾朋友叫朋友開們, 但係好耐都冇反應, 咁我就去敲門啦～  房門終於都打開啦, 但係裡面係冇人個喎！裡面冇開燈, 只係有好暗o既光, 我企咗係門口冇入去, 當我仲係度奇怪緊o既時候, 有份幫手拎心心波o既朋友仔 Stephen 彈咗出o黎, Surprise～～ 果一刻我至意識到, 原來, 呢間房係 Eric 為我而準備o既！！！ 真係好驚喜！！

房裡面o既裝飾真係好靚～～   我初初仲以為 Stephen 係幫我哋 Check In o嫁咋, 响唔該佢o既同時, 突然間, 早上有份幫手o既 + 其他朋友都彈晒出o黎！！果吓我真係好開心！！好開心！！好開心！！好意想不到o既驚喜！！！！ ( 亦因此而知道, 原來朋友們係識縮骨功o既！)

原來佢哋個個突然鳥獸散o既原因, 就係為咗我哋o既求婚後續做準備, 我真係錯怪咗你哋啦！！！！！I AM SO SORRY！！！！！

 

沿路都鋪滿蠟燭同花瓣, 好浪漫呀～～～ 

(最遺憾o既係.... 驚喜過後至發現, 佢只係話 "藉住今日向你求婚" 都冇叫我嫁俾佢！！！！！！！！！激死人啦！！！！ Eric 話佢當時緊張到都唔知講咩, 等我出場果 15min 好似等咗15個鐘咁, 超緊張震晒喎 ~~~ 到而家, 佢事後死都唔肯補返句 "你嫁俾我啦" 今次真係蝕呀！！！！！！)

後尾我個 fd 問我：[ 當 Eric 話帶你去太古城睇煙花果陣, 你唔覺得奇怪o既咩？？ ] 我話我唔覺有咩問題, 跟住個 fd 就話：[ 太古城個方向根本就係睇唔到煙花！！睇煙花响果面, 太古城响呢面 (我唔記得咗佢講咩方向) .... 點睇呀小姐...... ]

我：[ 咁我又真係唔知喎.... ]

Propose and Engagement on 1 Oct 2010!!!!!

1 Oct 2008 係我哋係埋一齊o既日子～
1 Oct 2010 係我哋兩週年紀念日 + Eric 向我求婚o既大日子！！！

案發早幾日, 我個 fd 亞 Wing (無間 Wing) 約我去銅鑼灣行街, 由於我唔知 Eric 會點安排慶祝活動, 所以我就問問 Eric 有冇意見啦～ 點知佢竟然超順攤話 OK 喎！其實果一剎那我都有小小奇怪點解佢會肯放人, 因為平時o既佢, 係絕對唔會咁做o既！！！(佢鐘意由朝玩到晚果隻) 不過由於我都製作緊神秘紀念禮物俾 Eric , 時間緊迫, Eric 唔一早約我出去都係一件好事, 所以我冇理咁多。

出到銅鑼灣週圍行, 行到差唔多, Eric 就打o黎話約係 Sogo 後面, Trendyland 等, 跟住亞 Wing 話佢都差唔多要走啦, 就話陪我行埋去搵 Eric 先～ 差唔多行到去....... 我見到好多人拎住 D 心心波！！望真 D！全部都係 fd o黎o既！？！？同時亞 Wing 亦行入人堆裡面, 出事啦！！！我完全唔敢行埋去, 仲係度扮途人
後尾 Eric 出o黎英雄救美, 拖我入去個 "心心人群陣" 度

唔知點解, 我當時冇感動到喊, 反而係咁笑！！！(樣衰到爆, 過份燦爛o既笑容, 攪到 D 相勁樣衰, HAHAHAHAHA)
我完全冇諗過佢會响當日求婚, 仲要係响銅鑼灣鬧市！仲要夾埋咁多朋友o黎幫手, 但係我事前係完全唔發現有任何蛛絲馬跡個喎！！
Eric 初初拎咗隻唔知幾多卡, 大大粒o既 "紅寶石海洋之心戒指" 出o黎玩o野

Eric 幫我戴戒指o既時候, 隻手超震, 好大力練實我隻無名指, 再套隻戒指入去 (唔通驚我走咗去？？ )

就係咁, 我就成為咗準楊太啦～
初初以為就咁就完成求婚項目, 點知原來, 仲有後續o嫁！！欲知後續如何, 還看下回分解～ ^^
基於唔知道朋友們鐘唔鐘意o既關係, 我就唔 Post 有佢哋個樣o既相出o黎啦～

So much effort has been devoted into this special event. Prior arrangement, buying all the decoration, coordination work, accomodation, food, flower...too much to name. Thanks for the support to all my friends who came and those who did not came due to some other reasons.

Special Thanks dedicated to:
Kid: Movie
Steve: Photo Taking
Stephen: Flower making and coordination
MT: Food prep - Jap food
Thomas: Food prep - Cake
Wing: 無間道
KT: Hotel Coordination
Sandy: Mental support and well understood your situation
Rest of you...Thanks for your support

多年冇寫 Blog, 決定為咗自己o既人生大事, 作一個紀錄!

唔知係懶, 太忙, 掛住玩定係咩o既原因, 已經好多年冇寫 Blog 啦~~

睇住好多人都為咗籌備自己o既婚禮而寫 Blog, 紀錄低自己同另一半o既種種經歷, 我覺得呢個係用錢都買唔到o既紀念同回憶!! 因為時間, 係足以能夠令人遺忘一 D 生命裡面細節上o既o野, 我唔想呢件事發生!! 因為結婚, 對我哋o黎講, 意義實在太重大啦!!!

所以, 我決定唔再懶, 我都要為我同 Eric 寫返一個 Blog 去紀錄低我哋籌備婚禮o既點滴, 心路歷程, 就算到到他朝明日, 真係遺忘咗細節, 我哋仍然可以上o黎睇返, 加強返我o地o既記憶~~ 因為.... 人, 係需要被提醒的...