Iris Wong *一個為結婚, 想寫下心路歷程留為紀念o既 Blog～*: 17-21 Dec 2011 -- 北漏道拉！史無前例跟團之旅 (Day 4)

20 Dec 2011 (Day 4)：
頭頓 → 鯨魚古廟 (相信只係跟團先至會去) → 耶穌山 → 返酒店梳洗 → 大頭蝦海鮮餐 → 隆城水果市場 (回程停留俾各人抖抖 + 去洗手間) → 胡志明市 → 越南歷史博物館 → 順化皇帝餐 → 自由人時間 → 期待已久大手掃入 NHU LAN 札肉時間

→ 搵餐死o既 Fanny 雪糕 → 返酒店休息

今日o黎到我地o既第二重點行程 -- 頭頓耶穌山！！！

神早起床o既景色～

第一站係鯨魚古廟 (我地覺得真係.... 去唔去都冇咩所謂)Eric 指住果幅係救人o既鯨魚畫像～

救人鯨色o既骸骨～

睇完骸骨冇咩好做, 周圍行俾我哋發現咗呢嚿o野～

Eric 第一時間衝咗上去玩～

攪攪吓, 連其他團友都玩埋一份

去完古廟, 就o黎到我地今日o既重點 -- 耶穌山啦！！我地o既目標係山上面豆豉咁細粒o既耶穌像～

繼續努力！！目標在望！！！

行咗 8 百幾級樓梯, 終於可以擁抱耶穌山啦！！！响耶穌o既神蹟下, 我來回 total 1600 級樓梯竟然冇腳痛, 冇攰！！！神蹟呀～～～

我地入咗耶穌個 Body, 準備上耶穌個博頭啦～

入到裡面咪以為已經行完, 我地仲要行多三層超窄o既樓梯～

就係等呢個 Moment！就係為咗呢個景色！幾辛苦都係值得o既！！！！好靚呀！！！！

等咗好耐o既 -- 耶穌o既側面～

多人到爆, 好想執走後面果兩條友！！ Eric 攪完一輪, 好辛苦至成功迫到上o黎～艱辛合照一張～
書仔話, 耶穌個博頭最多企到三個人, 但係當時有六個人响度(有兩個仲要係當地人, 死都唔肯走！！！

), 我不知幾擔心耶穌博頭有冇限制負重量..... 一陣大吉利是有 D 咩意外, 真係死在神o既懷抱呀！HAHAHA

大家睇吓, 我幫 Eric 影果張幾靚！！我果張.....條友仔影到我塊面包到！！！！過份...... 駛唔駛影到咁近..... T_T

幾經辛苦至排到個靚位影相～把握機會狂影相 XD
果日都幾熱, 熱到塊面都紅晒～

要走人啦！拿拿聲影多張風景相先～
真係不枉此行！各位有興趣去越南o既朋友, 真係要o黎呢度行吓！除咗古芝地道之外, 呢個係我第二個推介必到o既景點～！！！

行到身水身汗, 導遊安排我地返返酒店沖返個靚涼至繼續行程～我地覺得呢個安排係絕對正確同埋超級滿意呀！！！

梳洗好之後, 就去食海鮮餐啦～
呢個唔記得係咩果～咪睇佢好似好多剌咁, 其實佢一 D 都唔拮手, 仲軟淋淋添～！佢 D 果汁係白色o嫁, 都幾好味～

終於有唔係炸o既魚啦！！！好感動呀！！！！

隔離呢隻係星晨包o既 -- 大頭蝦是也！！最可惜係响街邊食咗餐一 D 都唔大隻, 又貴, 又被坤水o既"大頭蝦"！！！而時間又唔許何再食真正o既大頭蝦！好可惜呀！！！

食完個晏, 我地就坐返長途車出返黎胡志明市啦～途中當然又有停响果個坤水地方俾我地抖抖啦～今次我地只係坐定定, 冇再睇任何o野～

跟住落o黎, 就係去 "越南歷史博物館" 啦！呢個博物館好過 "戰爭博物館" 多多聲～多o野睇好多～

只可惜唔俾影相！！！導遊話响博物館影相要俾錢個喎！！！有冇攪錯....影咗呢兩張相就冇得再影啦......