本來打算琴晚响 Amy 屋企上網買定阿里山小火車車飛, 點知！！！竟然顯示所有車飛售罄！！
激唔開心！！明明臨飛前, 响香港睇過仲有大把飛, 隔咗都冇 20 小時！點解會突然爆晒o嫁！！
我哋勁擔心！(雖則都知可以坐公車上山, 但係我哋係目標係想坐小火車)
Amy 男友 "林大哥" o拿o拿淋幫手打電話問朋友租車上阿里山o既資料, 仲話如果去到嘉義台鐡站, 真係冇晒上阿里山o既火車飛的話, 就打俾佢呢個朋友, 佢會幫我哋o嫁啦～
話說早一日好好天, 我哋都好開心！
點知！！今朝起身, 竟然落狗 CCCCCCC, 個天係黑色的！好似黑雨咁款！勁擔心！我當時完全覺得個天係唔想我哋上阿里山, 火車飛又 Book 唔到, 又落咁大雨, 根本就冇可能睇到日出同埋雲海！！同埋都危險啦.........
Amy 見到天色咁樣, 廢事我哋呢咁 hea 拎住 D 行李冒雨搵車坐去高雄台鐡站, 佢索性車我哋去。行車其間, Amy 都有問過我哋係咪真係上阿里山, 定係留多日响高雄, 等天色好 D 直接去清境。
但係响 Eric 堅持下, 我哋都係決定照上阿里山！(好彩多得 Eric o既堅持, 呢個選擇係絕對正確o嫁！！)
Amy 仲千叮萬囑我哋如果去到嘉義台鐡站買唔到小火車車飛 / 最後因天氣關係而改變主意唔上山, 就打俾佢, 佢就過返o黎高雄站車我哋～ (真係好多謝佢同林大哥大力o既幫忙！！好彩最後都唔駛麻煩佢哋o者！)
去到嘉義站, 仲有小小雨粉, 但係已經好過今朝好多好多倍！！
我哋即刻仆到去搵賣小火車車飛o既售票處～ 好彩～～～～ 仲有飛o者！！！
我都有問售票姐姐點解琴晚上網顯示係售罄, 佢話個網唔準..........=_=" 真係俾佢嚇鬼死....................
買完 "阿里山小火車車票 + 阿里山森林入場劵" 之後, 我哋就打俾 Amy 報平安, 跟住就去搵o野食啦～ (因為距離上小火車時間, 都有段距離～)
最後我哋買咗 "排骨鐡道便當" , 都幾好食～ 但係個人認為上次去 "十分", 响瑞芳站買o既 "鐡道便當" 好味 D～
食飽飽之後, 我哋就去搵小火車o既月台啦～ (廢事一陣 Miss 咗班火車就大件事啦！！！因為一日只係開兩班！！我哋係坐 13:25-17:32, 行車時間全程係四小時！！Miss 咗就真係喊都無謂！)
火車o黎啦！好老實, 阿里山小火車o既外觀同內籠都唔係廣告果張相咁, 咁靚、咁吸引！不過係勝在夠特別！全程以 Z 形行駛上山, 成日向前行吓又停吓, 又倒後行吓, 初初我仲以為佢行錯路添！
一路坐火車, 一路欣賞沿路o既景色, 個森林真係好宏偉！好靚～
去到中途, 由於有一個站o既路之前因為打風打斷咗, 我哋要落車行一段崎嶇o既山路, 去坐另一架小火車, 需時係15-20 分鐘............
由於我哋一早做晒功課, 所以有晒心理準備要行, 其實本身行唔係問題～ 問題係我哋因為行程緊密o既關係, 要拎埋兩隻大牛龜上山, 真係慘過軍訓！！行到咁上下, 我同 Eric 都不知幾想o黎手飛咗呢兩件行李落山.... hahahahaha 仲要俾 D 路人串：[ 嘩.... 還要拿箱呀？]
當時地面又濕又滑, 條路仲要係得一條用中 Size 竹綁成, 所謂唔知係扶手定係欄杆o既物體, 高度只係到小腿o既中間！！根本完全發揮唔到欄杆o既功效！！
冼一冼腳真係隨時飛落山...山...山....山....... 應該真係會死得人o嫁！你都咪話唔驚！行完上返火車, 我哋非常之慶幸我哋唔係買來回火車飛 (回程預算坐公車去嘉義高鐡站), 如果唔係, 我哋都唔知仲有冇咁好心機同氣力, 拎住 D 行李再挑戰多一次果條山路！
終於都上到阿里山啦！！！！！！好興奮！！！！！
"欣欣民宿" o既員工已經 stand by 等緊我哋, 仲好好人咁借埋個牌俾我哋影相添！
第一時間梗係 Check In 咗 "欣欣民宿" 先啦～ 間民宿都唔錯, 乾淨企理, 仲要有暖氣添！！(當時氣溫 12度, 唔算好凍, 但係濕氣重, 所以都寒寒哋)
你哋睇吓, 幾咁豐富！！！！！
食飽飽周圍影吓相, 跟住就返民宿訓教啦！因為........ 為咗我哋o既彈跳式日出！聽朝要 3:50am 起身！坐 4:20am o既 "觀日火車"～
待續 ～ Day 3 ～
沒有留言:
張貼留言