o黎到 Day 2 啦！我哋四隻國寶一早起身食完個酒店早餐 ( 麻麻哋o即，都冇咩揀 …… )，9:00am 就即刻跳上我哋一早 Book 好o既民宿接待車 ( 原來係四人座的士…… )
出發去我哋 期待已久 o既 重點旅程 ── 墾～～丁～～！
由於車仔係四人的士，車尾廂放唔晒我哋 D 行理，有一舊被迫放响後座，我哋三位美女就坐得比較辛苦啦！唯有大家輪流換吓姿勢啦！
過咗大約個半鐘，我哋終於去到由朋友仔 Sam Sam 介紹，往墾丁必去o既第一個景點 ── 車城褔安宮！
褔安宮，其實係間 土地廟 o既名，呢間廟都幾大，香火都好鼎盛！
一場o黎到，我哋當然要 [ 入屋叫人，入廟拜神 ] 啦～～ 跟住仲請埋平安米添～～ 
我同傻燕掃完蛋蛋之後，就坐低咗，試吓司機哥哥話好出名、好好味o既車城褔安宮 第二名產 ── 綠豆蒜刨冰！
佢本身係綠豆蓉底，可以揀熱同凍，跟住再自選配料 e.g. 湯圓仔、仙草、愛玉、清心丸、珍珠、芒果、桃 …… etc.
我就揀咗酸到爆芒果 ( 酸到盲都開眼 T_T )、愛玉同埋仙草；而朋友仔就揀咗湯丸仔、愛玉同埋仙草！
佢真係冇介紹錯！雖則芒果真係酸咗 D，但係整體o黎講，真係幾好味！
尤其响咁熱o既天氣，一啖就愛上了！
尤其响咁熱o既天氣，一啖就愛上了！
嘆完刨冰，我哋嗱嗱聲上返車，繼續行程～ 沿途風光明媚呀～～
坐多八個字車程，就到咗 墾丁民宿～MA MA LU LU 啦！！！
我一上到房，第一個感覺係，呀～～～～ > O < 點解只係 Book 兩晚咁小呀！！！ 早知就 Book 多晚啦！！>_<
我哋住最高o既 3/F, 裡面係一間六人房o既樓中樓！其實間房未至於好靚，但係俾到一種好舒服o既感覺我哋，若果有機會再o黎墾丁，我哋都有可能會揀返呢間住。
成間房，第一時間吸引我o既，就係條旋轉樓梯！
我哋整理一吓行李，抖咗一陣，就即刻包車去玩兼食晏啦。
之但係，墾丁同香港唔同～～ 原來一過咗兩點，D 食店就會休息，至到五點至會開工！！
結果 …… 我哋o既 Lunch 竟然係 "大人細路都識o既 ── 麥記 ……" 
我哋仲得到一個全新體驗，就係，我哋從來未試過買四個麥記餐外賣，可以買超過半個鐘 ………………
响車一路食餐，一邊去咗 "船帆石" 影相
跟住就到我最想去o既主題 "鵝鑾鼻" 睇燈塔啦！！我哋仲謀殺咗好多數碼相，仲跳到好攰 …..hahah但係最可惜係，我第二想去睇o既 "台灣最南點"，响我做唔夠功課o既關係而 Miss 咗！
轉個頭，我哋就到咗 "貓鼻頭" 我哋搵咗好耐，先至搵到隻好似係貓o既石頭影相 …… 明明 D 人好靚家嘛！但係由於多雲，攪到 D 相影出o黎都唔多靚 ……. XD
由於就快日落，我哋又嗱嗱聲飛撲去 "關山" 睇日落啦！好失望呀！！！竟然而家至走o黎多雲！攪到乜都睇唔到 …….
話咁快就去到最後一個景點！就係 "出～～～火～～～"！朋友仔話，覺得 D 火應該唔係真係自己天然走出o黎，應該係有人安排o既！( 唔知呢？)
玩完火之後，我哋就返墾丁食 泰國菜 啦！個餐都幾抵！( 想知個餐包 D 咩？睇相啦！^o^ )
食飽飽之後，我哋就行 墾丁大街 啦！條街都幾有特色，我同傻燕仲俾人畫咗隻貓添！
我哋特登分別畫咗兩個版本，我就畫咗隻 野性版响背脊，傻燕就畫咗隻 溫柔版响手。( 有相為証o嫁！！)
結果 ……. 一時貪過癮o既代價係，明明已經攰到爆，返到民宿都仲要等多成九個字至可以沖涼訓教 …….. @@
( 因為"紋"身哥哥話，起碼半個鐘後至好沖涼，否則怕佢會溶 ……. 等足九個字，實冇死錯人啦卦……. )
响呢段時間冇咩做, 唯有同 D 戰利品影吓沙龍～ kekekeke
待續 ～ Day 3 ～
沒有留言:
張貼留言