^ O ^ 高雄 + 墾丁激曬激熱之旅 6/7/08 (Day 6)

其實 Day 5，我係抱住勁勁勁驚o既心情訓落床！

事源係，我哋遊完愛河返洒店，我、傻熊同埋傻燕都覺得肚餓，所以就決定去六合夜市掃街，而同我同房果個女仔朋友仔就話好攰想訓先，唔同我哋出去啦。

返到洒店房行過佢張床，佢 半睡半醒咁醒咗，講咗句：「 咦？你唔係著裙o既咩？點解你而家係著短褲o既？頭先明明見你著住條裙行過格！」

我呆咗，跟住我答佢：「 ar……. 我好攰，我而家唔想答你呢個問題住。」佢見到我神情微變，亦都o拿o拿聲訓教，冇再同我講野。

我心諗….. [ 小姐...... 你唔好嚇我喎.......... 我今日幾時有著過裙呀......... 你就梳呼啦～ 講完一句o野就訓！我！！仲未沖涼！仲要執行李嫁！！！ >.< ]

攪到我抱住超驚o既心情極速咁沖涼同執行李，即刻跳上床訓教！好！你好o野！！算你狠！！\ _ /

 

o黎到第六日o既朝早，我哋冇食洒店早餐，走咗去附近o既鋪仔食台式早餐 ── 蛋餅！( 同事話一定要試 ) 結果我哋覺得….. am…………… am….. 咁囉…..

食緊早餐o既時候，我終於忍唔住同傻熊、傻燕講呢件事，亦問返朋友仔究竟佢見到 D 咩。

佢話，佢真係見我冇出聲咁著住條裙行過，時間係响同我講o野前十分鐘倒，只係太攰冇叫我。加上佢見到問完我個問題，我好似嚇一嚇，神情怪怪哋，所以都唔敢再問。

跟住傻熊話，hey ～ 可能眼花o者！唔好諗咁多啦！我哋都只能唯有唔好諗咁多！好彩係最後一日o者～～

 

Check Out 咗之後，我哋就去咗傻燕最想去o既 夀山動物園！

 

    

   

 

 

麥當勞叔叔, 幾時連呢 D 都撈埋o嫁！？                        全台灣o既水族館同埋動物園o既分佈圖

  

行完之後，我哋覺得 D 動物好可憐，隻隻都瘦好似皮包骨咁 ……….. 完全符合晒佢哋o既園名 ── 夀命刪減動物園！台北果個好好多！大家冇乜必要 / 興趣o既話，可以慳返唔駛去，D 動物真係超慘。( 不過如果唔去, 間o野冇收入, 仲慘！！！)

 

跟住我哋把握最後機會，買手信！！跟住就返洒店拎行李，坐車去機場返香港啦！T_T排隔離行o既朋友仔, 行李色彩相當之繽紛～

  

結果…….. 班機竟然 DELAY！！等到差唔多 9:30pm 先至起飛........ 跟住返到香港唔單止落大雨，仲要架機冇埋到旅行通道，攪到我哋要等佢哋拎雨褸俾乘客，仲要行樓梯落地面再坐接駁巴士。( 但係最終，我哋冇見過件雨褸囉…… )

唯一安慰係..... 個飛機餐都幾好味～

呢個哥哥仔講大話！又話有雨褸俾我哋o既！！\ _ /
(點知原來係佢自己同埋其他機組人員著.....)

 

 

六日o既行程！寫完啦！終於都寫完啦！！( 好滾動….. )

整體上，都跟到我哋初初 Plan 果個行程，但係衰在我哋四個都太攰又懶訓，所以時間上就差得遠咗好多啦！但係大家都玩得好開心呀！^o^  下次再玩過！haha

 

～ 多謝各位收睇 ～