^ O ^ 高雄 + 墾丁激曬激熱之旅 5/7/08 (Day 5)

今日係旗津日！！！

 

今日晨咁早，我哋就出發去旗津啦！我哋去咗真愛碼頭 坐船，好老實，隻船一般般靚啦，船程亦只不過係幾分鐘。

一到埗，我哋嗱嗱聲去咗拎 Map，我哋至發現，佢話就話係漁村，但係我哋覺得，佢絕對絕對唔只係村咁簡單囉！

  

 

  

  

  

我離遠見到我好想去o既 旗津燈塔，第一個反應已經決定放棄！！！連當地人都叫我哋唔好去。

因為……. 我諗未上到去，我哋四條友應該已經會嚴重脫水 + 中暑！

 

我哋聽人講，旗津o既燒魷魚好好食，我哋就買咗三條試吓啦！口感都唔錯，又真係幾新鮮。

初初我哋諗住响碼頭租單車，但係又想格吓價，同埋周圍行吓睇吓試吓地道小食先。

結果！就係因為呢個 錯誤o既決定！導致我哋四個人，變咗四隻熱爆狗………. T_T

 

我响度奉勸各位，千祈唔好好似我哋咁選擇行一陣o既或想格價，因為你   會   極   度   後   悔！！！

因為原來由碼頭行去 斗六冰室 要行半個鐘，來回即係要一個鐘！！！就連平時都 OK 行得o既我，都行到差 D 想死 ！！

仲要係 烈日當空！萬里無雲！沿路仲要係一間單車鋪都冇………..

後尾至發現……. 原來單車只係 碼頭至有得租o嫁咋！！>.<

 

我哋完全感受到响地面被 乾煎 而我哋 極力掙扎 o既感覺！攪到連平時唔會點開遮遮太陽o既我，都頂唔順要開遮遮吓我 D 幼嫩o既肌膚～～ XD

 

我哋行到成隻o野咁，終於去到 斗六冰室 食雪糕！傻燕叫咗士多啤梨雪糕，我就叫咗 酸梅牛奶冰 好好味呀！！ 正爆！

冰涼解渴！簡直有冰涼暢快o既感覺呀！ Cool ～～～ 各位朋友，值得一試！

 

   

食完雪糕我哋就行返去碼頭租單車，我哋都睇中咗電動單車，可以唔駛咁辛苦狂踩嘛～～ ( 好彩真係冇就咁租人力單車！否則真係會死人！) 沿途o既風光都好靚，不過就真係曬咗 D 囉～

  

 

踩咗大約 30 分鐘，終於到達我極想去o既 風車公園！果度 風景真係好靚！我哋係咁影相！我哋絕對覺得無論幾熱都好，o黎到呢度，真係值回票價！呢度俾我哋感覺好舒服！去我哋又响呢度狂跳影相，hahaha

  

 

 

  

我哋跳咗好多次至有呢個成果o嫁！！！

謀殺完數碼相之後，我哋就踩單車去 萬三海鮮 食飯啦！勁抵呀！

  

呢度咁多o野都只係 NT450.00 咋！！！！極之抵食！！各位朋友仔有機會可以去試吓！

 

食飽飽，我地返去拎返架單車啦！點知！竟然發現 有人攪緊我哋果兩部單車喎！！傻熊二話不說，一個箭步去睇吓咩事！原來～～ 果個係單車鋪o既人，佢見我哋咁耐都未返去，驚我哋出事 (因為如果沿住條馬路直踩，原來係會唔知出咗去邊度市區o嫁！) 所以特登o黎搵我哋，順便帶我哋返去碼頭！

哥哥仔，好好人呀！！！*o*

還完車就四圍行咗一陣, 買手信～

 

 

行完旗津，我哋就坐船出返去真愛碼頭啦！等船中...........

呢期最愛o既燒仙草～ 好味道！！！

     

食完冰冰, 就轉戰 愛河 ── 愛滋船！( Oh！Sorry，傻熊講得多攪到我都攪錯咗添！應該係 愛之船 至啱！XD )

好老實…. 愛河呢，岸邊行吓，去 Bar 飲吓o野都還 OK 靚o既，但係若果話係坐船呢，我哋四個都認為，不坐也罷！D 景仲衰過沙田城門河！！

  

 


迷幻中的愛之船～

   


行完愛河，我哋再行咗陣六合夜市就返洒店做豬啦～～～

 

 

待續 ～ Day 6 ～