騰騰震！曼谷開心自由人之旅 16 Mar 2011 ( Day 2 )

第二日！！係大皇宮！！我哋比原定o既時間晏咗好多起身～ 但係都叫做跟到個行程～

S6 Central PIER 碼頭就响酒店隔離, 等咗一陣, 就有船啦～
响泰國坐呢 D 船, 航班係經唔同色o既旗仔o黎分o既～ 我哋要坐o既係橙色旗仔船～   (睇書仔其實仲有幾隻色o既, 但係已經唔記得咗啦, haha)
(搭船前往玉佛寺、大皇宮、臥佛寺、Museum of Siam，入場費350B, 在 N9 Tha Chang 下船, 必需由玉佛寺行起)




呢 D 船仔係上咗船先至買飛o嫁～ (船費每位 18 銖)

 

响泰國, 泰皇係無處不在o嫁！！！無論係電視、坐車, 任何地方都會見到泰皇o既 Poster、相同像！泰皇地位崇高, 備受尊重, 千祈唔好對佢有任何不敬呀！(否則後果自負)

到咗 N9 Tha Chang 站啦！

坐船o既朋友仔, 記住認住船尾支橙色旗仔呀～

落咗船直行, 好快就入到個市集, 買份芒果食吓先～ 勁甜呀！！

都唔算難搵, 不過大家記住, 入大皇宮係有 dress code o嫁！唔可以著背心, 短裙, 短褲, 因為會視為不敬～
不過著咗都唔緊要, 好似我咁有件外套都 OK, 而入皇宮門口附近有個 Customer Center, 有長裙 (一幅布果 D 呢～) 俾客人租借～

第一時間, 梗係走去買飛先啦！！

好緊要o既地圖～

唉.......... 不過最可惜係............ 你哋睇吓個天色......... 幾咁................ 差！！！

 

  

  

   

雕蘭玉砌～ 金碧輝煌～

呢度o既壁畫真係巧奪天工！！

全部都係人手畫o嫁！！！

參觀完呢邊, 我哋就向卧佛寺進發啦！
不過原來唔係太過方便, 因為離開咗大皇宮仲要行行行行行行........... 都真係幾唔近！

熱屎辣辣, 買返杯雪糕食吓先～                    好多旅遊巴呀～

    

大家見唔見到白色衫o既男人？果個就係傳說中o既 專講大話呃人去買假珠寶o既騙子囉！！ 大皇宮係年中無休, 唔會唔開o嫁！！大家千祈咪俾人呃呀！！

終於都行到卧佛寺啦！！不過真係冇諗過係小咁多o野行！捐咗小小錢同埋影咗幾張相就走人 lu！

  

至於鄭王廟, 我哋覺得應該都係同大皇宮差唔多, 所以就冇去到啦～
有興趣o既朋友可以繼續行程, 鄭王廟入場費30銖 (在 Tha Chang Pier N9 搭船到 N8，於 Tha Tien N8 坐船去 Wat Arun, 每位 6 銖)

一於轉戰 "又話啦” ！！！唐人街 China Town 是也！！！
聽當地人講, 由卧佛寺去唐人街要 100 銖～ 我哋成功講價, 80銖, 坐篤篤去 "又話啦"！kekekkeke

去到 "又話啦" 可能時間尚早 (4:00pm), 好多食檔都未開門～
我哋去咗 "美真香(老鋪)" 掃貨買手信！我哋買過咗 1200 銖, 直接送貨去酒店, 唔駛我哋拎！爽呀！！！
果度o既老闆娘好好人o嫁～ 我哋仲問佢去邊度食燕窩好添～

佢介紹咗我哋去 -- 義福巷燕窩！你哋睇吓！ 幾足料！！

  

由於真係太早冇咩o野行, 我哋又要趕下一場, 所以都係坐車走人先～ 坐 40 銖篤篤去 Hua Lamphong MTR Station (初初諗住行去o既, 好彩揀咗坐篤篤, 睇佢o既行車路線, 行去都真係幾係o野o嫁！Eric 都話好彩冇行～)

我哋改咗小小行程, 見有時間就一於去 National Stadium 站行運動用品一條街買 Wilson 產品 (Soi Chula.5 Rama 1 Road) 同埋去建興酒家 “Bantadthong Branch” 食晚飯 (National Stadium Exit 2 行去 SOI CHULA 8 約 5-10min)

大家千萬要記住！建興酒家係唔會有個"好"字o嫁！有個"好"字果間係假o嫁！千祈唔好俾人呃咗去 "建興好酒家" 呀！！

 

我哋叫咗粉絲蝦煲 (OK, 唔係特別驚喜, 但係都唔錯)、滷水豬手 (正到喊！！泰友營o既營友真係冇介紹錯！又淋又香！叫個細o既已經好夠食)、鐡板蠔仔 (非常之鮮甜！！) 同埋炒苦瓜葉 (爽口, 好味！)～

食飽飽之後, 就到咗 Iris 嘆世界之 -- 殷殷自由人時間 啦！！
其實事源係咁o既～ 當 Eric 俾晒錢, Book 咗做 SPA o既時候, 有營友話俾我知, 我哋果間o野做緊半價優惠！！！！ (只限泰友營會員) 我哋梗係o拿o拿聲問返佢哋優惠o既o野啦！佢哋話冇得 Refund, 但係就可以轉做其他o野, 就係因為咁, 就造就咗今次好似優惠咗o既 SPA 啦！(本來其實我哋係可以洗小 D 錢o嫁...... 唉..... 算啦......)

我哋咗坐車去 Ratchadamri 站 RarinJinda Wellness Spa (8/F, Grand Centre Point Hotel, Close @24:00)

我揀咗 His First Spa Touch @3,500 2.5hrs

Aromatic Hot Stone Massage, Guava Foot Polisher, Luxurious Facial Relaxation for Him (姐姐仔話, for him 同 for her, 其實用o既o野都係一樣個喎～)

Eric 放低咗我之後, 就展開佢o既淫亂自由人時間啦！
點解話佢淫亂？因為佢响我做 SPA o既時候, 竟然靜雞雞去咗行 Patpong Night Market 隔離果條 "驅風街"！！
佢話佢只係誤入, 一行入去四方八面o既馬夫即刻埋去兜撘佢～ 佢見到咁o既形勢, 就o拿o拿聲路過咗啦～！不過 Eric 話, 响果度開工o既人, 無論係男定女, 都真係好 "驅風" 吓！

  

  

做完 SPA, Eric 就返o黎湊返我返酒店啦～ 爽～


待續 ～ Day 3 ～