唔知會唔會衝動咗呢！？

終於都決定咗啦..........
前排見到報紙 AM 730 果位營養師 -- 黃凱詩小姐有免費講座, 講吓點樣修身, 食得健康減肚腩～
所以就捉埋 Eric 一齊去聽啦～我哋 Book 咗 17 Aug 2011 去聽講座, 聽完講座, 可以以 HKD80 約見營養師, 做小小健康測試, 我有諗過 Join o既, 但係 Eric 話唔好, 因為到時實會叫你 Join Package, 仲係咁拉我走～
隔咗幾日, 我決定自己去約見營養師了解多 D, 點知勁爆！！！我又唔想星期六日無啦啦出銅鑼灣, 所以就約咗 9 Sept 2011 (Friday) 6:00pm 啦！！咁啱之後我又約咗朋友 BBQ, 其實都見得幾趕, 但係我又唔想改日期, 加上琴日又放 5:30pm 所以都照見～
上到去做好晒測試之後, 我o既標準體重係 93 - 100 磅, 而最理想就係 97 磅～脂肪比例都超咗小小, 但係唔算嚴重～ 冇水腫～ BMI 亦屬於適中, 冇超標～
你話我好嚴重又唔係, 唔嚴重又唔係！！但係對於一位準備結婚o既女性o黎講, 梗係越瘦越好啦～ 加上我身邊好多人 (包括我屋企人) 都叫我減肥, 減肥, 減肥....... 雖則 Eric 冇開聲叫我減肥, 但係佢成日都話我好肉地！！！！哼！！！ (咁事實上.... 我又真係周身都係肉o既........ )
營養師問咗我好多飲食習慣o既o野, 都算暢談甚歡o既, 傾到最後, 佢先至計俾我睇究竟 Join Package 要幾錢～ 佢都冇好 Hard Sell 叫我 Join～佢本來只係計咗一個用 兩個月減 + 兩個月 Keep o既 Package 俾我, 因為佢話我減到 97 磅就已經 OK, 最理想同埋健康 D, 佢覺得唔需要再減～
我話佢知, 其實我係想減到 90 磅o既, 因為响未肥之前, 我係一直都係維持响 90 - 92 磅咁上下, 同埋我為食, 我覺得如果只係減到 97 磅, 我會好危險！！！但係佢唔建議, 亦唔會幫我減到去 90 磅, 因為太瘦會唔健康, 佢見我咁堅持, 佢話最多最多只可以幫我減到去 93 磅, 加多一個月, 用 三個月減 + 三個月 Keep o既 Package, 呢兩個 package 相差 HKD2,000.00 其實我內心都有掙扎一下, 但係又諗, 錢我都預咗俾o嫁啦～ 咁好似減多小小著數 D 喎！！！ (唉....女人～)
其實我都有諗過, 我係咪應該遲 D 至開始呢個減肥大計, 話晒 Total 都只係用半年時間, 距離我婚期都仲有成年～ 好驚自己會為食又肥返！！！我問佢, 如果我 2012 年 1月至開始呢個療程, 會唔會啱 D 呢？但係佢話減完係瘦咗, 但係我都要修返 D 手手腳腳o既線條家嘛～ 同埋好多人減完之後都冇話肥咗, 要返o黎搵佢哋, 只要之後就要學識點樣揀o野食 Keep 就 OK 啦～
跟住佢叫我考慮吓先, 唔駛咁快答覆, 唔一定要今日 Join o既～
不過我又心急, 又想快 D 減肥, 因為聽講座而 Book 又可以有 75折, 又可以做 12 個月分期！每個月都係幾百蚊o者～ 咁減完又啱啱可以 meet 到影婚紗相o既時間, 一於死就死啦！！！ 
結果...... 我 Join 咗啦！！！我揀咗 "三個月減 + 三個月 Keep" o既 Package！！

最好笑係, 當我決定揀呢個 Package 之後, 營養師大叫 [ 唉～～～～ 貪心o既女人！！！！！] 佢話, 其實佢真係好想好想好想, 我係揀 "兩個月減 + 兩個月Keep" 果個 Package, 因為佢覺得 97 磅就已經夠啦～ 跟住我話 [ 你冇講錯呀～ 女人, 不嬲都係貪心o嫁啦～ ] 跟住大家都爆笑, HAHAHAHAHA 

希望我冇一時衝動到啦........ 而我亦唔打算講俾 Eric 同我屋企人知, 因為我知道佢哋實會哦我o既！！！！等我成功咗至考慮吓講唔講佢哋知啦！
下個星期四 15 Sept 2011, 正式展開減肥大計！！！！